Бухоро, Самарқанд ва Тошкентда зиёрат туризми ҳафталиги ўтказилади

Туризмни ривожлантириш давлат қўмитаси томонидан Ўзбекистонда хорижий сайёҳлар келадиган ва чет эллик туристларни қабул қиладиган зиёратгоҳлар сони рўйхатга олинган. Улар 100 га яқин бўлиб, бу муқаддас қадамжоларда нафақат ислом, балки христиан, буддавийлик, яҳудийлик динига эътиқод қилувчилар ҳам зиёрат қилиш имконига эга. Рўйхати шакллантирилган зиёратгоҳларнинг аксарияти Хива, Самарқанд, Бухоро шаҳарларига тўғри келади.

Туризмни ривожлантириш давлат қўмитаси томонидан 10 январь куни ташкил этилган брифингда Таълим, фан ва маданият масалалари бўйича ислом ташкилоти (ISESCO) Бухоро шаҳрини 2020 йилда ислом олами маданияти пойтахти, деб эълон қилгани борасида маълумот берилди.

«2019 йилда зиёрат туризми конференциясининг натижаси самарали бўлди. Ўрганишлар шуни кўрсатдики, форумга ташриф буюрган турли меҳмонлар жуда кўплаб сайёҳларни Ўзбекистонга юборган. Ҳар биттаси билан алоқага чиқиб ўргандик. Форумнинг ёрдамчи натижалари ҳам жуда кўп бўлди. Дейлик, туризм соҳасига инвестиция киритганлар, туризм соҳасида меҳмонхоналарни бошқарувига олган ва университетлар, талабалар билан илмий-амалий анжуманларни ўтказиш ҳолатлари ҳам кузатилди», — деди Туризмни ривожлантириш давлат қўмитаси Зиёрат туризми бўлими бошлиғи Саидкомил Холхўжаев.

Ташкилот вакили бу борада жорий йилда амалга ошириладиган айрим режаларга ҳам тўхталиб ўтди.

«2019 йилда Бухоро шаҳрида ўтказилган I Халқаро зиёрат туризми форумини 2020 йил янада кенгроқ форматда — Ўзбекистон Зиёрат туризми ҳафталиги шаклида ўтказишни режалаштирдик. Бу тадбирлар нафақат Бухоро шаҳрида, балки Самарқанд, Тошкент шаҳарларида ҳам бўлади, турли йўналишлардаги соҳаларга оид тадбирларни қамраб олади. Ҳафталик доирасида Ўзбекистон ислом меросини ўрганиш ва уни зиёрат туризми орқали тарғиб қилишга бағишланган илмий анжуман ҳам ташкил қилинади. Унда халқаро миқёсда танилган турли ислом уламолари қатнашиши кутиляпти», — деди Холхўжаев.

Бундан ташқари, Сингапур билан ҳамкорликда «Halal and Travel» конференциясини ўтказиш ҳам режалаштирилмоқда. Бу конференцияда зиёрат туризми ва ҳалол туризмга оид 20 дан ортиқ экспертларни жалб қилган ҳолда соҳани ривожлантириш ва янги трендларни ўрганиш, улар билан ўртоқлашиш кўзда тутилган.

«Зиёрат туризмини тарғиб қилишдан асосий мақсад – туризм салоҳияти ва Ўзбекистоннинг ислом цивилизацияси маркази эканини дунёга ёйиш ҳисобланади. Бугунги кунда жаҳонда мусулмонлар сонининг ўсиши баробарида ислом тарихи ва ислом меросига бўлган қизиқиш ҳам ортиб боряпти. Кўпроқ Европа ва жанубий-шарқий Осиёдаги мусулмонларда қизиқиш уйғонмоқда.

Шу орқали биз Ўзбекистоннинг ислом оламида тутган ўрнини, буюк мутафаккирларимизнинг нафақат ислом, балки жаҳон цивилизациясига қўшган ҳиссасини кўрсата оламиз. Авваламбор, ўзимиз ўрганишимиз ва бошқаларга таништиришимиз орқали кимлигимизни эътироф этишга эришамиз», — деди Саидкомил Холхўжаев.