Усмонхон Алимов Президент фармонига асосан «Эл-юрт ҳурмати» ордени билан тақдирланди
Бугун, 6 январь куни Ўзбекистон мусулмонлари идораси раиси Усмонхон Алимов Президент Шавкат Мирзиёев фармонига асосан «Эл-юрт ҳурмати» ордени билан тақдирланди. Бу ҳақда идора матбуот хизмати хабар бермоқда.
Муфтий ҳазратларига кўп йиллик самарали фаолияти, ислом динининг олийжаноб ғояларини кенг тарғиб қилиб келаётгани ва таваллудининг 70 йиллиги муносабати билан ушбу мукофот топширилди.Қайд этиш жоизки, «Эл-юрт ҳурмати» ордени билан мамлакат мустақиллиги, унинг иқтисодий қудратини мустаҳкамлаш, миллий маънавият, маданиятни юксалтиришга катта ҳисса қўшган, ўз меҳнати, илмий, жамоат иши, меҳнатсеварлиги ва ватанпарварлиги билан жамоатчилигининг иззат-ҳурматига сазовор бўлган Ўзбекистон Республикаси фуқаролари мукофотланади.
Маълумот учун, Ўзбекистон мусулмонлари идораси раиси, муфтий Усмонхон Алимов 1950 йилда Самарқанд вилоятининг Иштихон туманида, зиёли оилада таваллуд топган. 1982—1983 йилларда Бухоро шаҳридаги Мир Араб мадрасаси, 1983—1987 йилларда Имом Бухорий номидаги Тошкент ислом институти, 1989—1990 йилларда эса Марокашнинг «Каравийн» дорилфунунида таҳсил олган.
1980—1982 йилларда Самарқанд вилоятининг Пайариқ туманида жойлашган Имом Бухорий номидаги жоме масжидида имом ноиби, 1987—1989 йиллар, сўнг яна 1990—2006 йиллар мобайнида ушбу масжиднинг имом-хатиби сифатида фаолият юритган. Шу билан бирга, 2000-2006 йилларда Ўзбекистон мусулмонлари идорасининг Самарқанд вилояти вакили, вилоят бош имом-хатиби лавозимида ишлаган.
Усмонхон Алимов 2006 йил 8 августда Ўзбекистон мусулмонлари идораси раиси, муфтий лавозимига тайинланиб, 14 йилдан буён шу лавозимда фаолият олиб бормоқда.
