Давлат активларини бошқариш агентлиги томонидан «Бозор ва савдо комплекслари фаолиятини янада такомиллаштириш ва улардаги давлат иштирокини қисқартириш чора-тадбирлари тўғрисида»ги Президент қарори лойиҳаси муҳокамага қўйилди.
Унга кўра, тадбиркорлик субъектлари ва инвесторларга қуриладиган бозор ва савдо комплекслари учун туман (шаҳар)лар режалаштириш лойиҳаси ва маъмурий-ҳудудий бирлигининг бош лойиҳасига мувофиқ, Тошкент, Нукус шаҳарлари ҳамда вилоятларнинг маъмурий марказларида шаҳар атрофидаги жойлардан ер ажратилиши белгиланади.
Бозор ва савдо комплексларининг (фаолият кўрсатаётган бозор негизида савдо комплекси ташкил қилинганда) қишлоқ хўжалиги озиқ-овқат маҳсулотлари расталари сони туман (шаҳар) аҳолисининг эҳтиёжларидан келиб чиқиб туман (шаҳар) ҳокимлиги ҳамда Монополияга қарши курашиш қўмитасининг ҳудудий бошқармаси билан келишилган ҳолда белгиланади.
Бунда, бозор ва савдо комплекслари қишлоқ хўжалиги озиқ-овқат маҳсулотлари расталарининг 20 фоизи Фермер, деҳқон хўжаликлари ва томорқа ер эгалари кенгашига (кейинги ўринларда Фермерлар кенгаши деб юритилади) унинг аъзоларини жойлаштириш учун ажратилади.
Фермерлар кенгашига:
- «Томорқа хизмати» МЧЖ билан биргаликда савдо расталарини узлуксиз, сифатли қишлоқ хўжалиги озиқ-овқат маҳсулотлари;
- фермерлар, деҳқонлар ва томорқа эгалари ўртасида савдо расталарини тенг шартларда шаффоф ва мақсадли тақсимлаш;
- бозор ва савдо комплекслари маъмурияти сўровномалари асосида талаб кўп қишлоқ хўжалиги озиқ-овқат маҳсулотлари нархларини барқарорлигини сақлаш мақсадида бозорни ушбу маҳсулотлар билан тўлдириш вазифалари юкланади.
- бозор ва савдо комплекслари фаолият турини сақлаш;
- қишлоқ хўжалиги, озиқ-овқат маҳсулотлари савдо расталари (павильонлари)ни тақсимлаш ва тўловни амалга оширишда шаффоф электрон тизимини жорий қилиш;
- бозор ва савдо комплекслари ҳудудида (ёнида) жойлашган автотураргохларида ҳисоблаш ва тўлов қабул қилишни автоматлаштирилган тизимини жорий қилиш;
- бозор ва савдо комплексларининг санитар ҳолатини талаб даражасида сақлаш;
- бозор ва савдо комплексларида давлат ветеринария-санитария экспертизаси лабораторияси, давлат ветеринария хизмати органларининг таянч пунктларини жойлаштириш учун махсус хоналар ҳамда санитария-эпидемиология хизмат назоратини ташкил қилиш;
- бозор ва савдо комплекслари ҳамда унга туташ ҳудудларнинг инфратузилмаси, шу жумладан йўлларини шакллантириш.
Изоҳ (0)