АҚШнинг Harper’s Bazaar нашри 2020 йилда туристларга саёҳат қилиш тавсия қилинадиган 20 та энг яхши йўналиш рўйхатини тақдим қилди. Бу ҳақда Туризмни ривожлантириш давлат қўмитаси Ахборот хизмати хабар берган.
Фото: «Дарё»
Америка нашрида жумладан, шундай дейилади: «Сайёрамизда бизни ҳайратга солувчи Эйфель минораси, Сидней опера театри ва Миср эҳромлари каби бир нечта сунъий иншоотлар мавжуд. Улар бизни мафтункорлиги, кўҳналиги билан ўзига чорлайди ва ўша томонларга боришга интиламиз. Мана шу ёдгорликлар қаторига яна бир мўъжиза — Самарқанд марказий майдонида жойлашган уч бинодан иборат мураккаб нақшлар билан безатилган мовий гумбазли Регистон майдонини қўшиш вақти келди».
Шунингдек, нашрда Ўзбекистонда янги инфратузилмалар барпо этилиб, бутик-отеллар пайдо бўлгани, ресторанлар эса Марказий Осиё таомларини хуш кўрувчи мижозларга хизмат кўрсатиши ҳақида ҳам маълумот берилган.
Harper’s Bazaar нашри барчани Ўзбекистонга саёҳат қилишга чорлаб, Самарқанд, Бухоро, Хива ҳамда Фарғона водийсидаги туристик масканларга алоҳида урғу бериб ўтган.
Фото: «Дарё»
«Фарғона водийси нафақат дунёдаги энг яхши кулолчилик буюмлари билан, балки сервиқор тоғлар билан ўралган гўзал манзаралари билан ҳам тароватли», — дейилади нашрдаги мақолада.
Мавзуга доир:
Журналда қайд этилишича, диққатга сазовор 20 талик рўхатга киритилган давлатлар келгуси ўн йилликнинг охирига келиб халқаро миқёсда энг «қайноқ» туристик нуқталарга айланиши кутилмоқда. Рўйхатда иккинчи ўринни — Ботсвана, учинчи ўринни Сидней (Австралия) эгаллаган. Ҳюстон (АҚШ), Бразилия, Япония, Нью-Йорк (АҚШ), Франция, Уругвай, Австриядаги туристик масканлар ҳам рейтингдан жой олган.
