Сурхондарё вилояти божхона бошқармаси контрабанда ва божхона қонунчилиги бузилишига қарши курашиш бўлими ходимлари томонидан ўтказилган тезкор тадбирда пиротехника воситаларини яширинча сотмоқчи бўлган фуқаро қўлга олинди. Бу ҳақда Давлат божхона қўмитаси матбуот хизмати хабар берди.
Тезкор тадбир давомида 5000 дона пиротехника воситаларини яширинча сотмоқчи бўлган фуқаро Х.А. тадбир иштирокчилари томонидан қўлга олинган.
Тадбир давом эттирилиб, фуқаро Х.А нинг кўрсатмасига биноан Музрабод туманида яшовчи фуқаро Ф.У.нинг яшаш хонадони холислар иштирокида кўздан кечирилганида 6500 дона пиротехника воситалари ҳамда 7 дона мушаклар борлиги маълум бўлган.
«Шундан сўнг Термиз шаҳри Сариосиё ва Ангор туманларида тезкор тадбир жадаллаштирилиб, ҳуқуқбузар фуқаролар қўлга олиниб, уларда ноқонуний савдога чиқарилаётган 15 119 дона пиротехника воситалари мавжудлиги аниқланди», — дейилади хабарда.
Ўтказилган тезкор тадбир давомида жами 26 626 дона пиротехника воситалари ашёвий далил сифатида олинган.
Ҳозирда мазкур ҳолатлар юзасидан божхона органлари томонидан суриштирув ҳаракатлари давом эттирилмоқда.
Изоҳ (0)