Қарши туманидаги «Шойхўжа» маҳалласи Ўзбекистон кўчасида яшовчи аҳоли лойгарчилик сабаб улар яшовчи кўчадан юриб бўлмаётганидан, фарзандлари мактабга бориш учун лой кечишга мажбурлигидан шикоят қилмоқда.
Бу ҳақда «Дарё» таҳририятига маълум қилган Гулираъно Абдиеванинг айтишича, ёмғир мавсуми бошлангач, кўчада ҳатто автомобиллар ҳаракатланишида ҳам муаммолар юзага келади.
— Ўтган куни кўчамизга кирган Matiz лойга ботиб қолди. Трактор чақириб, зўрға чиқариб олишган, — дейди Гулираъно Абдиева. – Машина ботиб қолгач, аҳволни тасаввур қилаверинг.
Ушбу кўчада яшовчи Дилбар Пирнаеванинг айтишича, фарзандлари лойгарчилик мавсумида мактабга боролмай қолгани боис уларни бобосининг уйида қолдирган.
— Лойнинг аҳволини қаранг, катта одам зўрға ҳаракатланади. Мактаб ёшидаги болалар эса ҳар доим лойга ботиб, йиқилиб тушади. Шу сабабдан ҳам болаларимни ота-онамнинг уйида қолдирдик. Ва ўша ердан мактабга қатнаяпти. Аммо бу ҳолат қачонгача давом этади, – дейди Дилбар Пирнаева.
Аҳоли вакилларининг «Дарё» мухбирига маълум қилишича, ушбу кўчага қиш мавсуми пайтида ҳатто тез ёрдам машинаси ҳам киролмайди.
— Тез ёрдам машинасини чақирсак, уйгача бормай кўча бошида тўхтайди, — дейди аҳоли вакиллари. – Тез ёрдам аҳволи оғир бемор учун чақирилади, одатда. Манзилга етолмай, кўча бошида қолгач унинг келгани, ёрдамга ошиққани аҳамиятини йўқотади-ку.
Ушбу кўчада яшовчи Шаҳзода Пирнаева ҳам боғча ёшидаги фарзандини ҳар куни эрталаб боғчага олиб бориш ва олиб қайтишда қийналаётганидан шикоят қилмоқда.
— Болаларимизни боғчага олиб кетиш учун ҳар куни Damas автомобили келади, аммо кўча бошида тўхтаб болаларни ўзимиз олиб чиқишимизни айтади. Чунки машина кўчамизга кирса, қайтиб чиқолмайди-да, — дейди Шаҳзода Пирнаева. – Бизга текис асфалт эмас, шағал тўкиб беришса ҳам розимиз. Аммо шунга ҳам лойиқ кўришмаяпти.
Гулираъно Абдиеванинг маълумот беришича, аҳоли вакиллари ушбу муаммо билан туман ҳокимлигига мурожаат қилган. Аммо натижа чиқмагач, Президент порталига чиқишган. Ушбу мурожаатни ўрганиш учун жорий йил 14 декабрь куни маҳаллага келган вакиллар йўл аҳволини кўриб, тез орада йўлга шағал тўкилиб, текисланишини айтишган ва қайтиб келмаган.
— Мурожаатимиз бўйича келган кишилар ўзимиз пул йиғиб тўккан битумни «Грэйдер» билан суриб ташлади, — дейди аҳоли вакиллари. — Сабабини сўрасак, текислаймиз, шағал тўкамиз дейишди. Шу-шу улардан дарак йўқ. Йўлимизнинг аҳволи баттар ёмонлашди.
Гулираъно Абдиеванинг маълумот беришича, мутасаддилар Президент порталига қилинган мурожаатни ёпиш учун ҳали текисланмаган ва бажарилмаган ишни бажардик, деб улардан шу ҳақдаги ҳужжатга имзо қўйишни сўраган.
— Маҳалла котиби Рустам Пардаев менга қўнғироқ қилиб, «йўлни текислаб кетишибди, шу ҳақда бизга ёзиб, қўл қўйиб беринг», дейди. Ҳали қилинмаган ишни бажардик, деб маълумот беришмоқчи. Мана сизга мутасаддиларнинг Президент ишончига бўлган жавоби. Эндиям буларга ишониш мумкинми?
Шойхўжаликларнинг айтишича, уларда электр токида ҳам муаммо бор. Кучланиш жуда паст.
— Кўчамизнинг ярмида бирорта ҳам симёғоч йўқ, — дейди Дилбар Пирнаева. – Электр токини томма-том ўтказиб, тортиб келганмиз. Токнинг кучланиши жуда паст.
— Янги йил куни барчамизнинг хонадонимизга меҳмон келади, — дейди Рушана Чориева. – Бундай ҳолатда бизникига қандай қилиб меҳмон келиши мумкин? Биз ҳам бошқалардек, яхши кўчада яшашга ҳақлимиз. Шундай эмасми?
Изоҳ (0)