2019 йил январь—ноябрда Ўзбекистоннинг ташқи савдо айланмаси 38,2 млрд доллардан ошди

Давлат статистика қўмитаси 2019 йилнинг январь—ноябрь ойларида Ўзбекистоннинг ташқи савдо айланмасига оид маълумотларни тақдим этди.

Қайд этилишича, 2019 йилнинг январь—ноябрь ойларида республиканинг ташқи савдо айланмаси ҳажми 38,2 миллиард доллардан ошиб, 9,5 миллиард долларга ёки ўтган йилнинг мос даврига нисбатан 33,4 фоизга ошган.

Ушбу кўрсаткичдан экспорт ҳажми 16,2 миллиард АҚШ долларига (ўсиш суръати — 43,3 фоиз) ва импорт ҳажми эса 22 миллиард АҚШ долларига (ўсиш суръати — 27,0 фоиз) етди. Ҳисобот даврида 5,7 миллиард АҚШ доллари қийматида пассив ташқи савдо айланмаси қайд этилди.

Ўзбекистон жаҳоннинг 190 га яқин мамлакат билан савдо алоқаларини амалга ошириб келмоқда. Республика ташқи савдо айланмасининг дунё давлатлари қаторига нисбатан салмоқли ҳиссаси Хитой Халқ Республикасида (19,2 фоиз), Россия Федерациясида (15,2 фоиз), Қозоғистонда (8,4 фоиз), Корея Республикасида (6,6 фоиз), Туркияда (5,9 фоиз), Германияда (2,4 фоиз) ва Қирғизистонда (2,0 фоиз) қайд этилган.

2019 йил январь—ноябрь ойлари якунларига кўра, МДҲ мамлакатлари билан савдо ҳажми 13 миллиард АҚШ долларини ташкил қилди ва Ўзбекистоннинг ташқи савдо айланмасидаги улуши 34,2 фоизга етди.

Қўшни давлатлар билан ижтимоий-иқтисодий алоқаларнинг мустаҳкамланиши ўзаро савдо-сотиқ алоқаларига ҳам ижобий таъсир кўрсатмоқда. МДҲ мамлакатлари билан ташқи савдонинг қарийб 34,2 фоизи, шундан экспортнинг 34,8 фоизи ва импортнинг 33,7 фоизи қўшни мамлакатлар ҳиссасига тўғри келади.

Бошқа хорижий давлатларнинг ташқи савдо айланмасидаги улуши 65,8 фоизга етиб (25,1 миллиард АҚШ доллари), ўтган йилнинг мос давридаги ташқи савдо айланмасига нисбатан 42,0 фоизга ошган.

Ташқи иқтисодий фаолият бўйича 20 та йирик ҳамкор-давлатлар орасидан бешта давлатда фаол ташқи савдо баланси кузатилган, хусусан, Афғонистон (550,6 миллион АҚШ доллари), Қирғизистон (494,0 миллион АҚШ доллари), Тожикистон (150,5 миллион АҚШ доллари), Франция (53,5 миллион АҚШ доллари) ва Эрон (9,1 миллион АҚШ доллари). Қолган 15 та давлат билан пассив ташқи савдо баланси сақланиб қолмоқда.