Наманганда Шавкат Мирзиёев топшириғидан сўнг қайта таъмирланган ахборот-кутубхона маркази фойдаланишга топширилди

Наманган шаҳрида Нодирабегим номидаги ахборот-кутубхона маркази фойдаланишга топширилди. Бу ҳақда «Дарё» мухбири Азизбек Абдувалиев хабар бермоқда.

Марказ бир вақтнинг ўзида 450 нафар китобхонга хизмат кўрсата олади. 573 минг китоб фондига эга, улардан 200 мингга яқини бадиий асар, 5000 номдагиси электрон китоблар. Мингдан ортиқ нодир китоблар, 100 мингдан ошиқ журнал, катта ададдаги газеталар сақланмоқда.

Очилиш маросимида вилоят ҳокими Хайрулло Бозоров, Президент Админстрацияси ҳузуридаги ахборот ва оммавий коммуникациялар агентлиги директори Комил Алламжонов сўзга чиқди.

— Давлат раҳбари шу йил Наманган вилоятига ташрифи чоғида вилоят кутубхона марказини замон талабларига мос равишда қайта таъмирлаш, китоб фондини бойитиш, мутолаа учун қулай шароит яратиш бўйича топшириқ берган эди. Бугун ана шу топшириқ ижроси юзасидан Нодирабегим номидаги ахборот-кутубхона биносини мутлақо янги кўринишда наманганлик китобхонлар ихтиёрига топширилмоқда. Барча шароит ва қулайликларга эга ушбу кутубхона Наманганда кутубхоначиликнинг 100 йиллиги ва Янги йил байрамига муносиб туҳфа бўлади, — деди Комил Алламжонов.

Реконструкциядан сўнг замонавий кўринишга эга бўлган бинода Боокcафе, янги адабиётлар кўргазмалар зали, медиа ва интернет зали, хорижий ёзувчилар асарларини ўқиб-ўрганиш учун дўстлик ўқув зали, шунингдек, Ўзбекистон, ёшлар ва илмий заллар мавжуд. Бу ерда масофадан туриб китоб ўқиш учун имконият яратилган. Ҳудудда юқори тезликдаги интернетга эга бўлган WI-FI зонаси мавжуд.

Ўқув маркази ҳамда болалар зали бежирим жиҳозланган. Нодирабегим залида эса шоиранинг ҳаёти ва ижоди, у яшаб ўтган даврдан ҳикоя қилувчи экспонатлар жойлаштирилди.

Марказни вилоят ҳокимлиги яна 60 минг дона китоб билан бойитди. Ўзбекистон Миллий кутубхонаси томонидан 50 миллион сўмлик энг сара адабиётлар совға қилинди.

Маълумот учун, марказ реконструкцияси ва таъмирлаш ишлари учун Ахборот соҳаси ва оммавий коммуникацияларни ривожлантиришни қўллаб-қувватлаш жамғармаси ҳамда Ўзбекистон ёшлар иттифоқи маблағлари ҳисобидан 10 миллиард сўм ажратилди. Вилоят ҳокимлиги томонидан 1,5 миллиард сўмга яқин ободонлаштириш ишлари амалга оширилди.

Тадбирда Ахборот ва оммавий коммуникациялар агентлиги директор ўринбосари Саида Мирзиёева иштирок этди.