Ўзбекистонда 22 декабрь куни бўлиб ўтган парламент сайловларида мамлакатда рўйхатга олинган беш партиядан тўрттасининг етакчиси бир уринишда Олий Мажлис Қонунчилик палатаси депутатлигига сайланди. Бу ҳақда партияларнинг вакиллари «Дарё» мухбирига маълум қилди.
Хусусан, Либерал-демократик партия етакчиси Актам Ҳайитов 136-Деҳқонобод сайлов округи (Қашқадарё)дан, Халқ демократик партияси етакчиси Улуғбек Иноятов 53-Янгиқўрғон сайлов округи (Наманган вилояти)дан, Экологик партия етакчиси Борий Алихонов 39-Қизилтепа сайлов округи (Навоий вилояти)дан, «Адолат» социал-демократик партияси етакчиси Наримон Умаров эса 82-Шўрчи сайлов округи (Сурхондарё вилояти)дан сайланган.
Фақат «Миллий тикланиш» демократик партияси етакчиси Алишер Қодиров сайловчиларнинг 50 фоиз овозини тўплай олмай, овоз бериш жараёнининг иккинчи турига ўтган. Олий Мажлис Қонунчилик палатасига унинг номзоди 36-Пахтакор сайлов округи (Жиззах вилояти)дан кўрсатилган эди. Қайд этиш жоиз, Қодиров «Sof.uz» нашрига берган интервьюсида депутатликка сайланганини таъкидлаган.
«Ҳа, депутатликка сайландим. Кечаси 00:30 даги маълумотларга кўра, 70 фоиз атрофида овоз олган эдим. Лекин ҳали тўлиқ ўрганилмади. Рақибларга қараганда фарқ катталиги учун мен депутатликка ўтдим дея ишонч билан айта оламан», — деб айтган «Миллий тикланиш». Айни вақтда @davletovuz каналида эълон қилинган ҳисоботда Жиззах вилоятидаги жами олти сайлов округидан фақат биттасида депутат сайлангани (қолганларида иккинчи тур бўлади), у ҳам Халқ демократик партияси (ЎзХДП) вакили экани кўрсатилган.
Маълумот учун, Олий Мажлис Қонунчилик палатасига сайловнинг дастлабки натижаларига кўра, ЎзЛиДеП 43 та, «Миллий тикланиш» 35 та, «Адолат» 21 та, ЎзХДП 18 та, Экологик партия эса 11 та депутатлик ўрнини қўлга киритган. 22 та округда сайловнинг иккинчи тури ўтказилади. «Миллий тикланиш» партияси етакчиси Алишер Қодировнинг сўзларига кўра, 15 та округда партия номзодлари иккинчи турга ўтган.
Изоҳ (0)