ОАВларни давлат рўйхатидан ўтказиш Давлат хизматлари марказларида амалга оширилади

Вазирлар Маҳкамасининг 2019 йил 19 декабрдаги қарорига асосан Ўзбекистонда оммавий ахборот воситаларини давлат рўйхатидан ўтказиш тартиби белгиланди. Бу ҳақда Давлат хизматлари агентлиги хабар берди.

Маълум қилинишича, ОАВни давлат рўйхатидан ўтказиш Давлат хизматлари марказларида амалга оширилади. Бунинг учун Давлат хизматлари марказига ёки «my.gov.uz» платформаси орқали ариза юбориш керак.

Сўровномага ОАВ ёки интернет нашри таҳририяти юридик шахс бўлмаган ҳолларда, таҳририят тўғрисидаги низомнинг нусхаси ҳамда муассис агар иккита бўлса, таъсис шартномаси илова қилинади.

Ариза берувчи учинчи шахс бўлган тақдирда тегишли тартибда берилган ишончноманинг электрон нусхаси сўровномага илова қилинади.

Ариза юборилгандан сўнг 15 кун мобайнида ваколатли орган ОАВни давлат рўйхатидан ўтказиш тўғрисида QR-код қўйилган қарор қабул қилади ёки давлат рўйхатидан ўтказишни рад этади.

Ариза берувчи хабарнома ва ОАВни давлат рўйхатидан ўтказиш тўғрисида қарорни олган пайтдан бошлаб 3 иш куни мобайнида белгиланган миқдорда давлат божини тўлайди.

Давлат божи миқдори қуйидагича:

• даврий босма нашрлар (газеталар, журналлар, ахборотномалар, бюллетенлар, алманахлар ва бошқалар) — базавий ҳисоблаш миқдорининг 12,5 баравари;
• теле, радио, видео, кинохроникал дастурлар, ахборот агентликлари — базавий ҳисоблаш миқдорининг 15 баравари;
• маҳсулотлари Интернет тармоғи орқали тарқатиладиган ОАВ (газеталар, журналлар, ахборотномалар, бюллетенлар, алманахлар, теле, радио, видео, кинохроникал дастурлар ва бошқалар) — базавий ҳисоблаш миқдорининг 50 фоизи;
• асосан болалар, ўсмирлар, ногиронлар учун мўлжалланган, шунингдек, таълим ва маданий-маърифий йўналишдаги ОАВ (газеталар, журналлар, ахборотномалар, бюллетенлар, алманахлар, теле, радио, видео, кинохроникал дастурлар ва бошқалар) — базавий ҳисоблаш миқдорининг 2,5 баравари;
• реклама хусусиятига эга бўлган ОАВ (рекламага ихтисослашган газеталар, журналлар, буклетлар, теле, радио, видео, кинохроникал дастурлар ва бошқалар) — базавий ҳисоблаш миқдорининг 25 баравари;
• ОАВларнинг бошқа турлари (электрон тарзда тарқатиладиган оммавий ахборот воситалари маҳсулотлари ва бошқалар) — базавий ҳисоблаш миқдорининг 12,5 баравари.