Ички ишлар вазирлигининг барча бўлимларида психолог лавозими жорий этилган. Психологлар ўз режасига асосан соҳа ходимлари билан навбатма-навбат суҳбатлар олиб боради. Вазирлик вакилларининг хизмат қилишга қай даражада тайёрлиги, муаммоси мавжуд ёки йўқлигини аниқлайди. Сўнгра раҳбариятга улар ҳақида ахборот беради. Бу ҳақда Ахборот ва оммавий коммуникациялар агентлигида ўтказилган брифингда маълум қилинди, дея хабар бермоқда «Дарё» мухбири.
Вазирлик вакили Азиз Файзиевнинг маълум қилишича, психологларнинг асосий вазифаси — ходимларнинг руҳий зўриқишлари, стресс ҳолатларининг олдини олиш, жамоадаги маънавий-руҳий муҳитни яхшилаш. Психологлар ҳар битта соҳавий хизмат бўлинмаларига бориб, ўша ердаги руҳий ҳолатни ўрганади ва раҳбариятга ўз хулосаларини тақдим қилиб боради. Саф бўлинмаларидаги ходимлар қурол билан хизматга чиқишгани боис кўпроқ уларнинг руҳий ҳолати психолог назоратидан ўтади. Шунингдек, вазирликнинг ҳамма бўлинмаларида руҳий енгиллик хоналари ҳам ташкил этилган.
Матбуот анжуманида ИИВ Кадрлар бош бошқармаси бўлим бошлиғи Фарид Абдиев ички ишлар ходимлари орасида ўз жонига қасд қилиш ҳолатлари ҳақидаги саволга муносабат билдирди.
Унинг сўзларига кўра, ўз жонига қасд қилиш ҳолатлари асосан хизмат фаолияти билан боғлиқ бўлмаган ҳолатларда содир бўлади. Оилада, қанақадир қарздорлик бўлган ҳолатларда рўй бериши мумкин.
Фарид Абдиевнинг маълум қилишича, хизматнинг иш юкламасидан келиб чиқиб, ўз жонига қасд қилиш ҳолатлари ёки хизмат пайтида қанақадир хизмат қуроли билан ўз жонига қасд қилиш камдан-кам бўлган. «Олдинлари бу ҳақда эшитганман, лекин сўнгги пайтларда бунақа ҳолатлар кузатилгани йўқ», — деди Фарид Абдиев.
Эслатиб ўтамиз, жорий йилнинг апрель ойи охирида Тошкент вилояти ИИБ Жазони ижро этиш бошқармаси тасарруфидаги 42-сонли манзил колония тартибот бўлинмаси тезкор вакили 27 ёшли А.А.нинг жасади хизмат кийимининг чарм камарига осилган ҳолатда топилган.
Изоҳ (0)