Айни пайтда Россияда яшаб ижод қилувчи, келиб чиқиши ўзбекистонлик хонанда Наргиз Зокирова телебошловчи Ксения Собчакка интервью берди. Интервью Собчакнинг YouTube каналига жойлаштирилди.
Наргиз Зокирова ушбу интервьюда собиқ турмуш ўртоғи томонидан калтаклангани, бунинг ортидан тушкунликка тушиб қолгани ҳамда антидепрессентларга ўрганиб қолгани ҳақида гапириб берди.
Ксения Собчак хонандадан «Иккинчи турмуш ўртоғингиз, яъни Ернур Канайбеков томонидан мунтазам зўравонлик ишлатилгани, калтакланганингиз ҳақида гапирган эдингиз. У автоҳалокатда ҳалок бўлганидан хабар топганингизда қандай ҳисларни бошдан кечирдингиз?» деган саволига Зокирова қуйидагича жавоб берди:
«Менда қайғу туйғуси бўлмаган. Мен унинг ҳалок бўлганидан ғам чекмадим. Мен фақатгина у билан ўртамизда бўлиб ўтган воқеаларга қарамай, ўғлимиз учун энг яхши ота бўлгани учун йиғладим. Ўғлим уни жонидан ортиқ кўрарди. Мен энди ўғлим севимли отасини бошқа ҳеч қачон кўролмаслигини ўйлаб йиғладим. Кейин… Бунақа ҳолатда ҳаётимда биринчи марта бўлди…Унинг тобутига яқинлашишга қўрқдим. У чиқиб келиб бўйнимдан бўғадигандек эди».
Хонанданинг айтишича, у собиқ турмуш ўртоғининг ўлимидан кейин психотерапевтга қатнаган, антидепрессант воситалар қабул қилган.
Изоҳ (0)