14 декабрь куни Қашқадарё вилояти ИИБ ЙҲХБ ЙПХ катта инспекторига ўз автомашинасини вақтинчалик жарима майдончасидан олиб чиқишда ёрдам сўраб, 500 минг сўм пора таклиф қилган ҳайдовчи қўлга олинди. Бу ҳақда Қашқадарё вилояти ИИБ Ахборот хизмати хабар берди.
13 декабрь куни соат 12:00 ларда Қарши шаҳарида хизмат олиб бораётган катта сержант Достон Эргашов Matiz русумли автомашина ҳайдовчиси хавфсизлик камарини тақмасдан бошқариб келаётганини кўриб, уни тўхтатган. Matiz ҳайдовчиси эса инспекторнинг тўхташ ишорасига амал қилмасдан ҳаракатини давом эттирган.
Ниҳоят шаҳарнинг Амир Темур кўчасида жойлашган Қарши давлат университети ёнида тўхтатилган автомашина ҳайдовчисидан бошқариш ҳуқуқини берувчи ҳужжатлари сўралганда у ҳеч қандай ҳужжат тақдим этмаган. Қоидабузарга нисбатан маъмурий баённома расмийлаштирилиб, автомашина вақтинчалик жарима майдончасига жойлаштирилган.
«Суриштирувда қоидабузар ҳайдовчи Қарши туманида яшовчи фуқаро А.Ж. эканлиги маълум бўлди. Эртаси куни фуқаро А.Ж. ЙПХ катта инспектори катта сержант Достон Эргашовга учрашиб, автомашинасини вақтинчалик жарима майдончасидан олиб чиқишда ёрдам берса, эвазига 500 000 сўм беришини билдиради. 14 декабрь куни соат 18:40 ларда фуқаро А.Ж. Достон Эргашовга 500 000 сўмни пора сифатида бераётган вақтида тадбир иштирокчилари томонидан қўлга олинди», — дейилади хабарда.
Ҳозирда мазкур ҳолат юзасидан Қарши шаҳар прокуратураси томонидан фуқаро А.Ж.га нисбатан жиноят иши қўзғатилиб, суриштирув ҳаракатлари олиб борилмоқда.
Изоҳ (0)