Ижтимоий тармоқларда тарқалган Самарқандда мактабга тегишли бўлган ҳудудда сауна қурилгани тарқалганлиги ҳақидаги хабар юзасидан Каттақўрғон туман ҳокимлиги ишчи гуруҳ ташкил қилиб, ҳолатни ўрганиб чиқди. Бу ҳақда «Дарё»га туман ҳокимлиги ахборот хизмати хабар берди.
Ўрганиш давомида аниқланишича, туман ҳокимлиги ҳузуридаги ер ажратиш комиссияси хулосасига кўра қонуний асосда тадбиркорлик фаолияти билан шуғулланиш учун ер майдони ажратиб берилган. Бу вақтда ажратилган ер майдони 41-умумтаълим мактабига қарашли бўлмаган, яъни туман ҳокимлиги захирасидаги ерлар ҳисобида бўлган.
«Сарайқўрғон» маҳалласи, Бурқут қишлоғида яшовчи Салойдин Эшқувватовга туман ҳокимининг 2015 йилги №641-Қ-сонли қарорига асосан мини-футбол майдончаси қуриш учун тегишли тартибда ер майдони ажратиб берилган. 2017 йилнинг 2 март кунги № 2009-Қ-сонли қарорига асосан «Мулк ҳуқуқини тан олиш тўғрисида»ги қарори чиқарилган.
Туман ҳокимининг 2017 йил 12 июнь кунги №1997-Қ-сонли қарорига асосан болалар ечиниш-кийиниш, душ ва сауна хоналари Салойдин Эшқувватовга қарашли бўлиб, 41-умумтаълим мактаби ер балансидан чиқарилган.
Салойдин Эшқувватовга қарашли ечиниш-кийиниш хоналари, кириш зали, бассейн, душ ва сауна хоналари СанПиН талабларига жавоб берадиган ҳолатда қурилган. Душ ва сауна биносини қуриш ишлари охирига етказилмаган, шу сабабли ҳозиргача ишлатилмаган.
Душ ва сауна мактаб биносидан 60 метр узоқликда жойлашган бўлиб, бинонинг майдони 146,32 метр квадратни ташкил этади. Ҳозирги кунда 41-умумтаълим мактабининг умумий майдони 4,08 гектарни ташкил этади. Мактаб ўқитувчи ва ўқувчилари кириб-чиқиши учун 2 та алоҳида дарвоза мавжуд. Душ ва сауна ҳамда мини-футбол майдони мактаб маъмурияти учун ноқулайликлар туғдирмайди. Ҳозиргача мактаб маъмуриятидан туман халқ таълими бўлимига ушбу ҳолат бўйича ҳеч қандай шикоят ва ариза тушмаган.
Айни пайтда тадбиркор томонидан қурилган мини-футбол майдонидан мактаб ўқувчилари ҳам жисмоний тарбия дарси пайтида фойдаланиб келмоқда. Қурилган мини-футбол майдони, душ ва сауна мактаб учун ҳеч қандай ноқулайлик туғдирмайди. Қолаверса, ҳозирда мазкур душ ва сауна умуман фаолият кўрсатаётгани йўқ.
«Ишчи гуруҳ ўрганиш жараёнида маълум бўлишича, мурожаатчи тадбиркор Салойдин Эшқувватовнинг ўгай опаси эканлиги, улар ўртасида қирқ йилдан буён давом этиб келаётган келишмовчилик сабаб ушбу ёлғон хабар билан унинг тадбиркорлик фаолиятига халақит беришга уринаётганлиги аниқланди.
Мактабда ишлаётган турмуш ўртоғи ва турмушга чиққан икки қизи ҳақиқатда олий маълумотли ўқитувчилар бўлиб, уларнинг мактабда ишлашлари қонунга зид эмас. Ижтимоий тармоқда берилган видеолавҳадаги гаплар воқеа жойида ўрганилганида асоссиз эканлиги аниқланди», — дейилади хабарда.
Изоҳ (0)