АҚШнинг JBL компанияси Reflect Eternal симсиз қулоқчинларни ишлаб чиқариш учун ижодий лойиҳаларни молиялаштиришга ёрдам берувчи Indiegogo сайтида маблағлар йиғишни бошлади, деб хабар бермоқда TJournal.
Қайд этилишича, ушбу қулоқчинларнинг энг муҳим хусусияти қуёш энергиясидан қувватланишидир. Шу сабабли JBL улар «деярли чексиз» ишлашини таъкидламоқда.
Компания Швециянинг Exeger компаниясининг Powerfoyle материалидан фойдаланади — у қулоқчинларнинг чамбарак (ободок)ини қоплаб туради. Қурилма яратувчиларнинг таъкидлашича, ушбу материал қулоқчинни доимий қувватлантириш учун қуёш нури ва ҳатто сунъий нурни энергияга айлантириб беради. Аммо тўғридан-тўғри қуёш нури таъсир қилмаса, қувватлантириш жараёни сезиларли даражада секинлашади.
JBL’да таъкидланишича, идеал шароитдаги кўчада бир ярим соат бўлиш қурилмада 68 соат мусиқа тинглаш учун етади. Икки ярим соат бўлиш эса қулоқчининг «деярли чексиз» ишлашига имконият яратади.
Шу билан бирга, Reflect Eternal қулоқчинини анъанавий усулда — кабель ёрдамида қувватлантириш мумкин. Қурилма яратувчилари бундай усулда 15 дақиқа қувватлантирилса, қулоқчин 2 соат ишлашини айтмоқда.
Ҳозирча ушбу қулоқчинлар консепт бошқичида турибди. У 2020 йилда сотувга чиқарилиши кутилмоқда. Қурилма АҚШ ва Германияда 165 долларда сотилади, аммо биринчи бўлиб буюртма қилганга чегирма нархда, 99 долларда сотилади.
Изоҳ (0)