«Picodi.com» таҳлилчилари дунёнинг 62 давлатидаги 223 та энг йирик чексиз интернет етказиб берувчилар томонидан тақдим этилган нархлар билан танишиб чиқиб, энг арзон интернет қаерда эканлиги ҳақида маълумот берди, деб хабар қилади Spot.
Интернетдан қулай фойдаланиш бир неча омилларга боғлиқ. Буларга қуйидагилар киради: номинал тариф ставкаси, тармоққа уланиш технологияси, симсиз сигналнинг уланиши, тармоқнинг юкланиши, шунингдек, ташриф буюрилган веб-сайт сифати ва унинг серверларига масофа.
Speedtest маълумотларига кўра, ҳозирги кунда дунёда симли интернетнинг ўртача тезлиги 70 Мбит/сонияни ташкил этади.
Ўз навбатида 100 Мбит/с — бу кўплаб давлатлар томонидан тақдим этиладиган ўртача интернет тезлиги ҳисобланади. Бу каби тезлик бир нечта қурилма орқали сайтларга кира олишни ва 4К форматидаги видеоларни кўришни бемалол таъминлайди.
Польша, Руминия, Франция ва Сингапур каби давлатларда йирик интернет-провайдерлар бу каби «паст» тезликни таклиф этмайди.
Польша ва Руминияда минимал тариф — 150 Мбит/с, Францияда — 200 Мбит/с, Сингапурда — 500 Мбит/с. Тожикистон, Туркманистон ва Вьетнамда эса 100 Мбит/с тезлик барчага ҳам берилмайди.
Кўриб чиқилган давлатлар орасида 100 Мбит/с интернет тезлиги учун ЖАР аҳолиси ойига 87 доллар тўласа, Исландия ва Норвегия аҳолиси 69 доллар тўлайди.
Айрим Шарқий Европа мамлакатлари эса бундан ҳам камроқ тўлайди: Молдова — ойига 9,66 доллар, Россия 7,68 доллар, Украина эса ойига — 6,19 доллар. Ўзбекистон ва Қирғизистон эса бу каби тезлик учун тегишли равишда 51,22 доллар ва 34,13 доллар тўлайди.
Қозоғистон энг паст нархлар бешлигига кириб улгурган — 11,21 доллар.
Руминия, Украина, Венгрия, Ҳиндистон, Молдова ва Латвияда 20 доллардан арзонроққа 1 Гбит/с тезликда интернет топиш мумкин. Россияда эса бу пулга 890 Мбит/с тезликдаги интернет мавжуд, Қирғизистонда — 40 Мбит/с, Ўзбекистонда — 20 Мбит/с, Тожикистонда — 1 Мбит/с.
1 Гбит/с тезликда 1 гигабайт файлни саккиз сония ичида юклаб олиш мумкин. Кўплаб давлатларда бу максимал таклиф этиладиган тезлик. Бу каби тезликнинг энг арзони Руминияда бўлиб, ойига 8,84 доллар туради. Марказий Осиёдаги йирик провайдерлар айни вақтда 1 Гбит/с тезликни тақдим этмайди.
Изоҳ (0)