2019 йилнинг 28 август куни ижтимоий тармоқларда Самарқандда Spark ва Nexia машиналари ҳайдовчилари итни босиб ўтишга уринаётгани видеоси тарқалган эди.
Олдин бунга Nexia ҳайдовчиси уриниб кўради, шундан сўнг Spark ҳайдовчиси уч марта ҳаракат қилди. Буларнинг бари милтилловчи кўк-қизил чироқларини ёқиб олган патрул-пост хизмати автомобили ёнида рўй берди. ППХ ходими эса итга тош улоқтиради.
Вилоят ИИБ матбуот хизмати 28 август куни соат 1:30 да Самарқанд шаҳар давлат санитария-эпидемиология назорати маркази томонидан шаҳарда бир гуруҳ фуқароларни ит тишлагани ҳақида шошилинч хабарнома келиб тушганини маълум қилган эди.
Шу хабарга асосан соат 3:00 да шаҳар ИИБ ППХБ ва ЖЦБ карантин тадбирларини таъминлаш гуруҳи ходимлари ва ит овлаш бригадаси воқеа жойига етиб бориб, қутурганликда гумон қилинган итни ушлаш чораларини кўрган.
Ушбу жараёнда ит тадбир иштирокчиси бўлган ички ишлар ходимига ҳам ташланган. Шу сабабли итни ушлашда зарур чоралар кўришга тўғри келган.
«Меҳр ва оқибат» жониворларни ҳимоя қилиш жамияти матбуот хизматининг хабар беришича, 16 декабрь, душанба куни ушбу ҳолат юзасидан жиноят ишлари бўйича Самарқанд шаҳар судида Nexia ва Spark ҳайдовчилари устидан суд жараёни бўлиб ўтган.
Ҳайдовчиларга нисбатан энг кам ойлик иш ҳақининг уч баравари миқдорида (600 минг сўмдан кўпроқ) жарима жазоси тайинланди.
Қайд этилишича, ҳайвонларни ҳимоя қилувчи ташкилот вакиллари ҳозирда ушбу ҳайдовчилар устидан ЙҲХБга ариза тайёрламоқда. Улар аризада ҳайдовчилар йўл ҳаракати қоидаларини бузганлиги ҳамда авариявий ҳолат юзага келтиргани учун жазоланиши керак деб ҳисобламоқда.
Шунингдек, итга қарата тош отган ва ўқ узган ИИБ ходимининг ҳаракатларига қонуний баҳо бериш учун ташкилот ташаббуси билан прокуратура текшируви тайёрланмоқда.
Аввалроқ Тошкент шаҳрида номаълум шахслар томонидан итнинг устига бензин сепиб ёқиб юборилгани ҳақида хабар берилган эди. Пойтахт ИИББ уларнинг шахсини аниқлаш билан шуғулланаётганини маълум қилди.
Изоҳ (0)