Ўзбекистон Халқ таълими вазирлиги Вазирлар Маҳкамасининг «Умумий ўрта таълим муассасаларида «Тарбия» фанини босқичма-босқич амалиётга жорий қилиш чоралари тўғрисида»ги қарори лойиҳасини жамоатчилик муҳокамаси учун эълон қилди. Бу ҳақда вазирлик хабар берди.
Маълум қилинишича, мазкур қарор лойиҳаси Ўзбекистон Президенти Шавкат Мирзиёев раислигида жорий йилнинг 23 август куни халқ таълими тизимини ривожлантириш, педагогларнинг малакаси ва жамиятдаги нуфузини ошириш, ёш авлод маънавиятини юксалтириш масалаларига бағишланган видеоселектор йиғилишида берилган топшириқлар ижросини таъминлаш мақсадида ишлаб чиқилган.
Қайд этилишича, мазкур қарор лойиҳасида назарда тутилган «Тарбия» фани умумий ўрта таълим муассасаларида амалда бўлган «Одобнома», «Ватан туйғуси», «Миллий ғоя» ва «Дунё динлари тарихи» каби фанларни бирлаштирган ҳолда жорий этилади.
Қарор лойиҳасига кўра, умумий ўрта таълим муассасаларида «Тарбия» фани 1—9-синфларда 2020/2021-ўқув йилидан, 10—11-синфларда 2021/2022-ўқув йилидан бошлаб босқичма-босқич амалиётга жорий этиш кўзда тутилмоқда.
Қарор билан «Умумий ўрта таълим муассасаларининг 1—11-синфлари учун ‘Тарбия’ фани Концепцияси»ни, «Тарбия» фанидан дарсликлар ва ўқув-методик мажмуаларни яратиш бўйича тузувчилар гуруҳи таркибини тасдиқлаш назарда тутилмоқда.
Таъкидланишича, 2020 йилнинг апрель—май ойларида «Тарбия» фанининг 1—9-синф дарсликлари ва ўқув-методик мажмуалари тажриба-синовдан ўтказилади.
Тажриба-синов натижаларига кўра, такомиллаштирилган ҳолда чоп этилган «Тарбия» дарсликлари ва уларнинг мультимедиа иловалари янги ўқув йили бошлангунга қадар мактабларга етказиб берилади, дейилади вазирлик хабарида.
Изоҳ (0)