Ўзбекистон бош вазири ўринбосари, молия вазири Жамшид Қўчқоровнинг маълум қилишича, айни пайтда Ўзбекистон ҳукумати Евросиё иқтисодий иттифоқининг имкониятларини батафсил ўрганмоқда. Бу ҳақда Sputnik хабар берди.
Молия вазирининг сўзларига кўра, Ўзбекистон ЕОИИ доирасидаги интеграция жараёнларининг ижобий ва салбий томонларини баҳолаб чиқмоқда. «Менимча, ижобий томонлар кўпроқ. Қарор қабул қилиш бир кунда ёки бир ойда амалга ошириладиган иш эмас. Агар бу бизга фойдали бўлса, ЕОИИга кирамиз», — деб таъкидлаган Жамшид Қўчқоров.
Мавзуга доир: Содиқ Сафоев: Ўзбекистон Евросиё иқтисодий иттифоқига қўшилиш имкониятларини уч йилдан бери ўрганяпти
«Ҳар қандай мамлакат, шу жумладан, Ўзбекистон ҳам жаҳон иқтисодиётига, савдо муносабатларига, қандайдир инфратузилма жараёнларига интеграция бўлишга интилади. Атрофимизда юз бераётган жараёнлар, албатта, бизнинг эътиборимиздан четда қолмайди ва ҳисобга олинади», — дея қайд этган молия вазири.
Аввалроқ АҚШ савдо вазири Ўзбекистоннинг ЕОИИга қўшилиши қандай оқибатларни келтириб чиқариши ҳақида гапирган эди.
Мавзуга доир: Илҳом Неъматов Ўзбекистон ЕОИИ масаласида биринчи навбатда миллий манфаатларга таянишини маълум қилди
Ўзбекистоннинг мазкур иттифоққа аъзо бўлиши мумкинлиги ҳақида эса дастлаб октябрь ойида Россиянинг Федерациялар кенгаши раиси Валентина Матвиенко маълум қилган.
Мавзуга доир: Ўзбекистон ва ЕОИИ: иқтисодий муносабатлар рақамларда
Изоҳ (0)