Фарғонада МИБ ходимига таҳдид қилган шахс суд залида қилмиши учун жавоб берди. Бу ҳақда «Марказий студия» хабар бермоқда.
Ўткирбек Тўлқинжонов жорий йил 19 август куни алиментдан қарзи 10 миллион сўмдан ошиб кетган фуқаро уйига қарздорликни ундириш учун боради.
— Уйга кирмоқчи бўлганимда бунга фаол қаршилик қилди. Оёғимга темир лом билан уриб, ерга ётқизди, — дейди МИБ ходими.
Фарзанди таъминотини ўз вақтида бажармай, қонунларга қарши борган шахснинг давлат ижрочисига тан жароҳати етказиш билан боғлиқ хатти-ҳаракати жиноят ишлари бўйича Қува туман судида жамоатчилик иштирокида муҳокама қилинди.
Сайёр судда ўз қилмишидан пушаймон эканлигини билдирган судланувчига 3,5 йил озодликдан чеклаш жазоси тайинланди. Шунингдек, суд ҳукми билан жабрланувчига етказилган моддий ва маънавий зарар ундирилиши белгиланди.
Изоҳ (0)