9 декабрь, душанба куни Эроннинг Zagros Airlines авиакомпанияси томонидан «Теҳрон—Тошкент—Теҳрон» йўналишидаги илк мунтазам авиарейс амалга оширилди. Делегация Туризмни ривожлантириш давлат қўмитаси вакиллари томонидан тантанали кутиб олинди. Бу ҳақда қўмита матбуот хизмати хабар берган.
Хабарга кўра, Эрон авиакомпанияси дастлабки босқичда мазкур йўналишдаги парвозларни ҳафтасига бир марта бажаради, кейинчалик парвозлар мунтазамлилиги ҳафтасига икки мартага етказилиши режалаштирилган.
Парвоз 148 кишини ўзида сиғдира олувчи Airbus А320 самолётида амалга оширилди. Рейснинг илк йўловчилари Эрон Ислом Республикасининг ҳукумат вакиллари ҳамда туроператорлар вакиллари бўлди. Ушбу рейснинг ташкил этилишидан кўзланган мақсад Эрондан келувчи туристик оқимни ривожлантиришдан иборат.
Эрон ва Ўзбекистон ўртасидаги охирги рейс 2016 йилда амалга оширилган. Ўзбекистон ва Эрон ўртасидаги мунтазам парвозларнинг тикланиши икки мамлакат ўртасидаги савдо-иқтисодий, маданий-гуманитар ва сайёҳлик соҳаларидаги ҳамкорликни янада ривожлантиришга туртки беради. Статистик кўрсаткичларга кўра, Эрондан Ўзбекистонга келаётган сайёҳлар сони 25 фоизга ошган. Шу йилнинг январь-ноябрь ойида Ўзбекистонга 3124 нафар Эрон фуқароси туризм мақсадида ташриф буюрган. 2018 йилнинг худди шу даврида эса бу кўрсаткич 2507 кишини ташкил қилган.
Эрон Ислом Республикасининг Zagros Airlines авиакомпанияси 2005 йилда Ободон шаҳрида ташкил этилган. Авиакомпания Меҳробод ва Ободон халқаро аэропортларидан ўзининг операцион базаси сифатида фойдаланади. Zagros Airlines авиакомпанияси бугунга келиб Арманистон (Ереван), Озарбайжон (Баку), Ироқ (Нажаф, Бағдод), Туркия (Истанбул, Измир) ва БАА (Дубай) давлатларига авиақатновларни йўлга қўйган.
Аввал Транспорт вазирлиги Ўзбекистон ва Эрон ўртасида мунтазам парвозлар расман тикланганини маълум қилганди.
Изоҳ (0)