“O‘ztemiryo‘lyo‘lovchi” kompaniyasining Xalqaro yo‘nalishda yo‘lovchilarga xizmat ko‘rsatish filiali vagon kuzatuvchisiga nisbatan tovlamachilik qilgan shaxsga nisbatan jinoyat ishi ochildi. Bu xaqda Transportda xavfsizlikni ta’minlash bosh boshqarmasi Toshkent mintaqasidagi temiryo‘l transportida xavfsizlikni ta’minlash boshqarmasi tergov bo‘limi boshlig‘i podpolkovnik Sherzod Xolmurotov “Daryo”ga ma’lum qildi.
Aniqlanishicha, “Moskva—Toshkent” yo‘nalishidagi poyezdda oila a’zolarini O‘zbekiston jo‘natmoqchi bo‘lgan fuqaro R.X. Moskva shahridagi temiryo‘l vokzalida vagon kuzatuvchisi A.B.dan belgilangan me’yordan ortiq yuklarini olib ketishni talab qilgan. A.B. esa uning harakatlari noqonuniyligini, me’yordan ortiq yuk uchun qo‘shimcha to‘lov kvitansiyasi rasmiylashtirish lozimligini tushuntiradi va ortiqcha yuklari orasidagi hajmi juda katta bo‘lgan televizorni vagondan tushirib qoldiradi.
Fuqaro R.X. O‘zbekistonga qaytib kelgach, vagon kuzatuvchisi A.B.ni ish joyiga kelib, unga go‘yoki televizori Moskva shahrida qolib ketganligini aytadi. Undan televizor pulini to‘lab berishni, bir million so‘m talab qiladi. Aks holda yuqori idoralarda ishlovchi tanishlari orqali uni ishdan bo‘shattirishini, OAV yoki ijtimoiy tarmoqlarga chiqartirib sharmanda qilishni aytadi. Vagon kuzatuvchisi esa go‘yoki ushbu talabga rozi bo‘lib, o‘sha zahotiyoq huquqni muhofaza qiluvchi idoralarga murojaat qiladi.
Transportda xavfsizlikni ta’minlash bosh boshqarmasi Toshkent mintaqasidagi temir yo‘l transportida xavfsizlikni ta’minlash boshqarmasi tezkor xodimlari tomonidan o‘tkazilgan tezkor tadbir natijasida Toshkentdagi savdo markazlaridan birining oldida fuqaro R.X. vagon kuzatuvchisi A.B.dan bir million so‘mni olgan vaqti ushlangan. Tergov bo‘limi tomonidan fuqaro R.X.ga nisbatan Jinoyat Kodeksining 165-moddasi (tovlamachiik) bilan jinoyat ishi qo‘zg‘atilgan.
Izoh (0)