Сохта ҳужжатлар тайёрлаб, 153 миллион сўмни ўзлаштириб юборган темирйўл чипта сотувчиларининг жиноий гуруҳи фош этилди. Бу ҳақда Транспортда хавфсизликни таъминлаш бош бошқармаси Тошкент минтақасидаги темирйўл транспортида хавфсизликни таъминлаш бошқармаси тергов бўлими бошлиғи, подполковник Шерзод Холмуротов «Дарё»га маълум қилди.
Бошқарма ва «Ўзтемирйўлйўловчи» компаниясининг тушумларни назорат қилиш бўлими ходимлари ўтказган хизмат текшируви давомида Тошкент йўловчи ташишни ташкил этиш филиали нақд пулсиз чипта сотиш чиптахоналари чипта сотувчи агентлари томонидан сотилган чипталарнинг қонунийлиги кўриб чиқилган.
«Ўрганиш натижасида чипта сотувчи вазифасида ишлаб келган З.М, У.Т, О.Р. Ш.У.дан иборат жиноий гуруҳ фош этилди», — деди тергов бўлими катта терговчиси майор Абдусалом Эргашев.
Жиноий гуруҳ аъзолари 2018 йил давомида ҳужжатларни сохталаштириш йўли билан темирйўл чипталарини сотишдан тушган 153 миллион сўмни ўзлаштириб юборган. Шунингдек, ҳар ой «Ўзтемирйўлйўловчи» компаниясига сохта ҳисоботлар тақдим этиб келган.
Ҳолат юзасидан З.М, У.Т, О.Р. Ш.У.га нисбатан жиноят иши қўзғатилиб, айблов эълон қилинган. Дастлабки тергов даврида айбланувчилар томонидан етказилган зарар тўлиқ қопланган. Жиноят иши судга юборилган.
Изоҳ (0)