Ижтимоий тармоқларда ўқитувчи ўқувчини калтаклаётгани акс этган видео тарқалди. «Qalampir.uz»нинг аниқлик киритишича воқеа Сурхондарё вилоятининг Музработ туманидаги 7-мактабда рўй берган.
Журналист Наргиза Раҳматуллаеванинг «Дарё»га қўшимча қилишича, видео қаҳрамонлари 7-мактаб ўқитувчиси Алишер Юсупов ҳамда ўқувчи Жасур Раҳмонов.
Айтилишича, мактаб ўқитувчиси Алишер Юсупов ўзи раҳбарлик қилиб келаётган 10 «Б» синф ўқувчиси Жасур Раҳмоновни сабабсиз дарс қолдиргани учун калтаклаган.
Маълум бўлишича, жорий йилнинг 16 ноябрь куни мактабнинг 10«Б» синфида таълим олаётган ўқувчилардан 4 нафари дарсга келмаган. 18 ноябрь куни дарс қолдирган ўқувчилар ҳаракатини муҳокама қилаётган Алишер Юсупов эса дарс қолдирганлар орасидан ўқувчиси Жасур Раҳмоновга тарсаки туширган. Ва сабабсиз дарс қолдиргани учун койиган.
Видеодан англашилишича, дарс қолдирган ўқувчилар 4 нафар эмас, 6 нафар. Ўқитувчи дарс қолдирган ўқувчилар учун мактаб директоридан танбеҳ эшитган.
— Бир нарса бўлиб қолдинг кўчада, аризанг йўқ. Йўқламага тушмагансан, ким жавоб беради?, — дея савол билан юзланади ўқитувчи ўқувчига.
Ўқитувчи журналист Наргиза Раҳматуллаева билан суҳбатда қилмишидан пушаймонлигини айтиб, узр сўраган.
— Ўқувчимни урганимдан афсусдаман. Жаҳлимга эрк бериб юбордим, бунинг учун ўқувчимдан бутун ўқитувчилар олдида кечирим сўрайман, — дейди 10«Б» синф раҳбари Алишер Юсупов.
Ўқувчи Жасур Раҳмоновнинг онаси Наргиза Ҳайиталиева бу ҳолатда ўқитувчини айбламаслигини, унга нисбатан ҳеч қандай шикояти йўқлигини айтиб «Менга фарзандимни тўғри тарбиялаб берса бўлди, биз ҳам мактабда ўқиганмиз ўқитувчилардан танбеҳ эшитардик, буни тўғри қабул қилишимиз керак. Ўқитувчи ҳам ўқувчим яхши бўлсин деб койийди, уришади, — дейди Наргиза Ҳайиталиева.
Жасур Раҳмонов 16 ноябрь куни дарс қолдирганини мол бозорга тушгани билан изоҳлайди.
— Мактабда бўлиб ўтган ушбу ҳолат музработлик педагоглар учун ёмон ҳолат, — дейди Музработ туман халқ таълими бўлими мудири ўринбосари Салоҳиддин Ҳамраев. — Ўқитувчи ва ўқувчи орасида тушунмовчилик юзага келганлиги боис, шу ҳолат келиб чиққан. Аммо ушбу жараён ўрганилади ва ўқитувчи айбдор бўлса албатта чора кўрилади.
Изоҳ (0)