Ироқ шимолида жойлашган Киркук вилоятида турли ҳудудларда рўй берган учта портлаш оқибатида ҳалок бўлганлар сони 16 нафарга етди. Бу ҳақда «Ал-Жазира» телеканали тиббиёт ходимлари маълумотига асосланиб хабар берди, деб ёзмоқда «РИА Новости».
Киркукнинг учта жойида портлашлар юз берган, ушбу ҳодисалар оқибатида 11 нафар одам, жумладан ҳарбийлар турли даражада тан жароҳатлари олган.
Ироқдаги ҳукуматга қарши намойишлар 1 октябрда бошланган. 2 октябрда Ироқ ҳудудининг 75 фоиз қисмида интернет ўчириб қўйилган ва 11 октябрда қайта ишга туширилганди. Ироқдаги намойишларнинг биринчи босқичида кучишлатар тизим ҳамда халқ ўртасидаги тўқнашувлар натижасида 157 нафар одам: 149 нафар фуқаро ва 8 нафар хавфсизлик хизмати ходимлари ҳалок бўлган, қарийб 3,5 минг одам турли даражадаги тан жароҳатлари олган.Маълум вақт танаффусдан сўнг яна қайта бошланган норозиликларда полиция ҳамда халқ ўртасида кучли тўқнашувлар кузатилмоқда. Намойишчилар вилоятлардаги сиёсий партиялар офислари, маҳаллий ҳокимликлар ва дипломатик ваколатхоналар биноларини ёқишга урингани ва уларнинг айримларига ўт қўйгани, Ироқдаги намойишларда ҳалок бўлганлар сони 250 нафардан ошгани хабар қилинган. Al-Sumaria телеканали маълумотига кўра интернетни ўчириб қўйиш Ироқ ҳукуматига 1 миллиард АҚШ долларига тушган. Полиция ҳамда аҳоли вакиллари ўртасидаги тўқнашувларда юзлаб одамлар ҳалок бўлган.
Изоҳ (0)