Бош прокуратура ижтимоий тармоқларда тарқалган «Ҳайдовчи Қорақалпоқда ДАН ходимлари билан жанжалдан сўнг сирли тарзда оламдан ўтди» сарлавҳали мақола юзасидан баёнот берди.
Қорақалпоғистон Республикаси прокуратураси томонидан 12 ноябрда А-380 «Ғузор—Бухоро—Нукус—Бейноу» йўналишида фуқаро Н.Ҳолиқовнинг мурдаси топилганлиги ҳолати юзасидан терговга қадар текшириш ҳаракатлари олиб борилмоқда.
Аниқланишича, 12 ноябрь, сешанба куни тахминан соат 22:00 ларда Қўнғирот туманидаги божхона постида фуқаро С.Уринов бошқарувидаги Lacetti русумли автомашинаси Қорақалпоғистон Республикаси ИИВ ЙҲХБ 3-сафарбарлик гуруҳи инспекторлари томонидан тўхтатилиб, йўл ҳаракати хавфсизлиги қоидаси бузилганлиги ҳолати юзасидан баённома расмийлаштирилиши ҳақида айтилганида, автомашина йўловчиси О.Ҳусанов инспекторларни ҳақорат қилган.
О.Ҳусанов инспекторлар билан жанжаллашган вақтида автомашина йўловчиси Самарқанд вилояти Нуробод туманида яшовчи Н.Ҳолиқов ушбу ҳолатни телефонининг видео камерасига олиш жараёнида ЙҲХБ инспекторлари ундан видеога олмаслигини сўраган. Шунда Н.Ҳолиқов ЙҲХБ инспекторлари телефонини олиб қўймаслиги учун автомашинадан тушиб қочиб кетган.
Бироз вақт ўтганидан сўнг А-380 «Ғузор—Бухоро—Нукус—Бейноу» асфалт йўлининг 874—875-километрида (тадбир ўтказилаётган жойидан 450 метр узоқликда) Н.Ҳолиқовнинг мурдаси топилган.
Суд-тиббий экспертизасининг дастлабки хулосасига кўра, марҳум Н.Ҳолиқовнинг ўлимига юрак қон томир етишмовчилиги сабаб бўлган.
Ҳозирги кунда ушбу ҳолат юзасидан Қорақалпоғистон Республикаси прокуратураси томонидан терговга қадар текширув ҳаракатлари олиб борилмоқда.
Ҳолат бўйича ЙҲХБ ходимларининг хатти-ҳаракатлари юзасидан хизмат текшируви тайинланган.
Изоҳ (0)