Қашқадарё вилоятининг Қамаши туманида яшовчи 54 ёшли аёл Бибихол Эшмирзаева фуқаролик паспортида эркак сифатида кўрсатилган. Шу боисдан ҳам онахон нафақага чиқолмай сарсон бўлмоқда, дея хабар беради «Дарё» мухбири.
Маълум бўлишича, қамашилик Бибихол Эшмирзаевага 2015 йил 2 август куни биометрик паспорт берилган. Мутахассисларнинг эътиборсизлиги боис паспортда фуқаронинг жинси кўрсатиладиган жойда «эркак» деб ёзилган. Бу ҳақда бир кундан сўнг хабар топган паспорт эгалари эътироз билдирган ва хатоликни тўғирлаб бериш сўралган.
«Ўша пайт қайта расмга тушиб, яна паспорт учун тўлов қилиш айтилган. Табиийки, уйдагилар бунга рози бўлмаган. Хато сизларники, энди муаммони ечиш ҳам ўзларига боғлиқ дейишган. ‘Паспорт стол’дагилар ‘хўп’ деб, паспортни олиб қолишган ва эртасига тўғирлаб беришган. Ҳақиқатан ҳам паспортда ҳозирда аёл деб ёзилган. Аммо онам базада ҳамон эркак сифатида қолиб кетган экан», — дейди Бибихол Эшмирзаеванинг ўғли Асқар Раҳимов.
Айтилишича, Бибихол Эшмирзаева 2019 йил октябрь ойида нафақага чиқиш тараддудига тушган. Ва ҳужжатлар топширган. Бироқ маълумотлар базасида эркак сифатида қайд этилгани боис ишлари тўхтаб қолган.
«Октябрь ойида фуқароликни расмийлаштириш бўлимига яна мурожаат қилдик ва ўша пайтда йўл қўйилган хато тўғирланмаганини — фуқаронинг инглиз тилида жинси кўрсатиладиган қисмида лотинча «М» ҳарфи турганини, бу инглизчада ‘man’ яъни эркак деган маънони беришини тушунтирдик. Аммо ходимлар бу бизнинг хатомиз эмас, ўша пайтда ишлаган ходимларнинг хатоси, шунинг учун яна давлат божи тўласангиз тўғирлаб берамиз дейишди. Имконсизликдан хўп дедик. 23 октябрь куни ‘паспорт стол’га бориб, давлат божини қайта тўлаб онамни расмга туширдик. Бир ҳафтада тайёр бўлади, дейишди. Аммо 1 ноябрь куни қўнғироқ қилишиб, онамни яна олиб боришимизни ва қайта расмга олишлари кераклигини айтишди. Сабабини сўрасак алоҳида гуруҳ қилиб, паспортни тезлаштиришларини айтишди. Яна расмга тушдик. Энг қизиғи, 8 ноябрь куни яна қўнғироқ қилиб, келиб расмга тушиб кетинг дейишди. Сабр косаси тўлаган отам жаҳл қилиб, бормаймиз деди. Шу-шу мана неча ойдирки, сарсонмиз», — дейди Асқар Раҳимов.
Асқар Раҳимовнинг қўшимча қилишича, бу ҳақда ИИВнинг 11-02 қисқа рақамларига ҳам мурожаат қилишган. Лекин натижа йўқ.
«Бугун эрталаб телефон қилишди ва паспорт тайёр олиб кетинг дейишди, аммо унчалик ҳам ишонмаяпмиз», — дейди Асқар Раҳимов.
Изоҳ (0)