Ижтимоий тармоқларда Қарши шаҳрида жойлашган «Журналистлар уйи» биноси ачинарли аҳволга тушиб қолгани ҳақида маълумот тарқалди.
Қашқадарё вилояти ахборот хизматининг хабар беришича, ушбу маълумот вилоят ҳокими вазифасини бажарувчи Зоир Мирзаевга етказилган.
Бу масалада вилоят ҳокими жорий йилнинг 18 ноябрь куни масъуллар билан йиғилиш ўтказиб, тегишли топшириқларни берган.
Жумладан, вилоят ҳокими ўринбосари С.Азизов ва вилоят молия бошқармаси бошлиғи Ф.Юсуповга таъмирлаш ишларини тез орада якунлаш бўйича аниқ чора-тадбирлар белгилаш, шунингдек, вилоят ҳокими ўринбосари Д.Аллаевга қурилиш якунига етганидан сўнг журналист ва мухбирларни очиқ ва шаффоф усулда бинога жойлаштириш бўйича вилоят ҳокимига таклиф киритиши белгиланган.
Шунингдек, вилоят ҳокими юқоридаги масала бўйича Ахборот ва оммавий коммуникациялар агентлигининг вилоят бошқармаси бошлиғи У.Нусуров билан ҳам учрашиб, муаммони ҳал этиш учун ҳаракат қилаётганлигини, вилоятнинг журналист ва ижодкорлари учун муносиб шарт-шароитлар яратиб бериш бўйича бир қатор режалари борлигини ҳам маълум қилган.
Вилоят ҳокими ўринбосари С.Азизовнинг маълум қилишича, бинога ҳозиргача 1 миллиард 300 миллион сўм сарфланган. Аммо, таъмирлаш ишларини якунлаш учун яна қўшимча маблағ зарур. Ушбу маблағ масаласи ҳал этилиши билан таъмирлаш ишлари бошлаб юборилади.
Ахборот ва оммавий коммуникациялар агентлиги директори ўринбосари Саида Мирзиёева «Журналистлар уйи»нинг тез орада таъмирлаб, фойдаланишга топширилишига умид билдирди.
«Ачинарли аҳволга тушиб қолган Қашқадарё вилояти ‘Журналистлар уйи’ биноси, умид қиламизки, Қашқадарё вилояти ҳокимлиги томонидан тез фурсатда бартараф этилади. Биз ҳам унинг фойдаланишга топшириш маросимида иштирок этиб, баҳонада вилоят журналист ва блогерлари билан учрашишга тайёрмиз», — деб ёзади Саида Мирзиёева.
Изоҳ (0)