Қашқадарё вилоятининг Қарши туманида икки Damas тўқнашиши оқибатида 5 нафар киши вафот этгани хусусида хабар берилганди.
Ўша тўқнашувда иштирокчи бўлган 210-йўналишида ҳаракатланувчи Damas’лар фаолиятини назорат қилувчи уюшманинг лицензияси жазо тариқасида 10 кунга тўхтатилган. Бу ҳақда Қашқадарё транспорт бошқармасида бўлиб ўтган матбуот анжуманида маълум қилинди, дея хабар беради «Дарё» мухбири.
Қайд этилишича, ўша мудҳиш воқеага сабаб бўлган йўловчи ташувчи автомобиллар фаолияти «Шаҳзод автотранс» МЧЖ томонидан лицензияланган.
«Уюшма лицензияси 10 кунга тўхтатилган бўлса-да, Damas’лар ўз фаолиятини давом эттирган ва 10 дан ортиқ ҳайдовчиларнинг ноқонуний фаолияти аниқланди. Шу боисдан ҳам мазкур йўналиш аъзолигидаги 10 дан ортиқ ҳайдовчиларга нисбатан чора кўришни сўраб судга мурожаат қилдик», — дейди бошқарма мутасаддиси Озод Ҳайитов.
Қашқадарё транспорт бошқармаси бошлиғи Улуғбек Эрназаровнинг қўшимча қилишича, 210-йўналиш уюшмаси масъулларининг эътиборсизлиги лицензияни 10 кунга тўхтатиб қўйиш билан чекланмайди. Мазкур ҳолат ҳуқуқни муҳофаза қилувчи органлар томонидан назоратига олинган бўлиб, айни кунда тергов-суриштирув жараёнлари кетмоқда.
Икки Damas иштирокидаги мудҳиш йўл-транспорт ҳодисаси 2019 йилнинг сентябрида юз берган эди. Ҳалокат соат 8:00 да Хонобод қишлоғидан чиқувчи иккинчи даражали йўлнинг «Қарши—Шаҳрисабз» йўлига туташ қисмида юз берган, оқибатда беш киши ҳодиса жойида ҳалок бўлган, яна бир неча киши жароҳатланган эди.
Изоҳ (0)