Фавқулодда вазиятлар вазирлигининг Гидрометеорология хизматига таяниб берган маълумотларига кўра, 21—25 ноябрь кунлари А-373 «Тошкент—Ўш» автомобиль йўлининг Қамчиқ довони қисмида вақти-вақти билан қор ёғади. Шу сабабли вазирлик довондан ўтмоқчи бўлган ҳайдовчиларни ҳушёр бўлишга чақиради.
Таъкидланишича, туман тушиб, кўринувчанлик 50 метргача пасаяши, шамол тезлиги секундига 17—22 метргача кучайиши, йўлда қор уюмлари, музламалар ҳосил бўлиши мумкин.
Шу муносабат билан йўл транспорт ҳодисалари билан боғлиқ фавқулодда вазиятларнинг олдини олиш мақсадида, довон ҳудудида ҳаракатланишдан олдин қуйидаги мутахассис тавсияларига эътибор қаратиш сўралади:
- автомобилларнинг техник ҳолатини тўлиқ кўздан кечириш;
- довон орқали етарли даражада ёқилғи-мойлаш маҳсулотлари билан ҳаракатланиш;
- автотехникаларнинг қиш мавсумида ҳаракатланиш учун махсус шиналар билан алмаштириш;
- ҳайдовчиларнинг Қамчиқ довони орқали ҳаракатланганда ҳушёрликни янада оширишлари ва йўлларда тўхтаб дам олишлари;
- вилоятлараро юк ташиш билан шуғулланувчи ташкилотлар, фирмалар, хусусий тадбиркорлар томонидан ҳайдовчилар билан профилактик тадбирлар ўтказилиши.
Қамчиқ махсус қидирув-қутқарув бошқармаси навбатчилик қисми: (95) 146-87-08, (70) 662-72-49, (71) 212-70-07, (99) 837-29-38, 10-50.
Изоҳ (0)