Давлат солиқ қўмитаси фойда солиғи бўйича қўшимча ҳисобланган ва ундирилган солиқлар сабабини маълум қилди

Давлат солиқ қўмитаси сўнгги кунларда фойда солиғи бўйича қўшимча ҳисобланган ва ундирилган солиқлар юзасидан солиқ тўловчилар йўллаган эътирозларни ўрганиб чиқди, деб хабар беради қўмита матбуот хизмати.

Хусусан, «Сарой мулки» корхонаси (корхона номи ўзгартирилган) 2019 йил 9 ойи давомида 43,3 миллиард сўм, шундан июль—сентябрь ойларида 9,6 миллиард сўм реализацияни амалга оширган. 2019 йил III чорак жорий тўлов (аванс) учун тақдим этган маълумотномасига асосан 90,0 миллион сўм фойда солиғи ҳисоблаган.

Корхона томонидан жорий йил II чораги учун 799,2 миллион сўм фойда солиғи ҳисобланган, яъни III чорак учун ўртача 709,2 миллион сўмга (799,2—90,0) камайтириб маълумотнома тақдим этилган.

Агар жорий тўлов бўйича аниқлаштирилган маълумотнома тақдим қилинмай, III чорак якуни бўйича октябрь ойида берилган ҳисоботда 709,2 миллион сўмга қўшимча солиқ ҳисобланса, ушбу сумманинг июль, август ва сентябрь ойлари учун пеня тўланиши керак.

Солиқ кодексининг 164-моддасига асосан ҳисобот даври мобайнида юридик шахслардан олинадиган фойда солиғи жорий тўловларни киритиш орқали тўланади ва жорий ҳисобот даври учун тахмин қилинаётган солиқ солинадиган фойдадан ҳамда юридик шахслардан олинадиган фойда солиғининг белгиланган ставкасидан келиб чиқиб ҳисобланади.

Тахмин қилинаётган солиқ солинадиган фойдадан келиб чиққан ҳолда ҳисоблаб чиқарилган фойда солиғи суммаси ҳисобот даври учун бюджетга тўланиши лозим бўлган фойда солиғи суммасига нисбатан 10 фоиздан кўпроқ камайтирилган тақдирда ҳақиқий суммасидан келиб чиқиб пеня ҳисобланиши назарда тутилган.

«Айрим ҳудудий давлат солиқ инспекцияларининг мансабдор шахслари томонидан товар айланмасини ёки фойдани камайтириб кўрсатишга ҳеч қандай асоси бўлмаган солиқ тўловчиларнинг III чорак фойда солиғи ҳисоботига нисбатан IV чорак учун кам фойда солиғи ҳисобланганлиги тўғрисидаги мурожаатномалар юборилган.