Davlat soliq qo‘mitasi so‘nggi kunlarda foyda solig‘i bo‘yicha qo‘shimcha hisoblangan va undirilgan soliqlar yuzasidan soliq to‘lovchilar yo‘llagan e’tirozlarni o‘rganib chiqdi, deb xabar beradi qo‘mita matbuot xizmati.
Xususan, “Saroy mulki” korxonasi (korxona nomi o‘zgartirilgan) 2019-yil 9 oyi davomida 43,3 milliard so‘m, shundan iyul—sentabr oylarida 9,6 milliard so‘m realizatsiyani amalga oshirgan. 2019-yil III chorak joriy to‘lov (avans) uchun taqdim etgan ma’lumotnomasiga asosan 90,0 million so‘m foyda solig‘i hisoblagan.
Korxona tomonidan joriy yil II choragi uchun 799,2 million so‘m foyda solig‘i hisoblangan, ya’ni III chorak uchun o‘rtacha 709,2 million so‘mga (799,2—90,0) kamaytirib ma’lumotnoma taqdim etilgan.
Agar joriy to‘lov bo‘yicha aniqlashtirilgan ma’lumotnoma taqdim qilinmay, III chorak yakuni bo‘yicha oktabr oyida berilgan hisobotda 709,2 million so‘mga qo‘shimcha soliq hisoblansa, ushbu summaning iyul, avgust va sentabr oylari uchun penya to‘lanishi kerak.
Soliq kodeksining 164-moddasiga asosan hisobot davri mobaynida yuridik shaxslardan olinadigan foyda solig‘i joriy to‘lovlarni kiritish orqali to‘lanadi va joriy hisobot davri uchun taxmin qilinayotgan soliq solinadigan foydadan hamda yuridik shaxslardan olinadigan foyda solig‘ining belgilangan stavkasidan kelib chiqib hisoblanadi.
Taxmin qilinayotgan soliq solinadigan foydadan kelib chiqqan holda hisoblab chiqarilgan foyda solig‘i summasi hisobot davri uchun budjetga to‘lanishi lozim bo‘lgan foyda solig‘i summasiga nisbatan 10 foizdan ko‘proq kamaytirilgan taqdirda haqiqiy summasidan kelib chiqib penya hisoblanishi nazarda tutilgan.
“Ayrim hududiy davlat soliq inspeksiyalarining mansabdor shaxslari tomonidan tovar aylanmasini yoki foydani kamaytirib ko‘rsatishga hech qanday asosi bo‘lmagan soliq to‘lovchilarning III chorak foyda solig‘i hisobotiga nisbatan IV chorak uchun kam foyda solig‘i hisoblanganligi to‘g‘risidagi murojaatnomalar yuborilgan.
Unda soliq to‘lovchilarga aniqlangan tafovutlarni qayta ko‘rib chiqib, o‘ziga qulay va ma’qul bo‘lgan vaqtda o‘zaro muhokama qilish uchun davlat soliq inspeksiyasiga tashrif buyurgan holda tushuntirish berilishi ma’lum qilingan”, — deyiladi xabarda.
Izoh (0)