Ўзбекистон бош прокурор ўринбосари Светлана Ортиқова Фарғона водийси вилоятларида бўлиб ўтган сайёр қабуллар давомида ногиронлиги бўлган шахслар ҳолидан хабар олди, улар учун зарур бўлган ногиронлар аравачаларини топширди. Бу ҳақда Бош прокуратура «Дарё»га маълум қилди.
Бош прокурор ўринбосари Светлан Ортиқова томонидан жорий йилнинг 11—16 ноябрь кунлари Наманган, Андижон ва Фарғона вилоятларида аҳоли билан сайёр қабуллар ўтказилди.
Сайёр қабуллар давомида жами 283 нафар фуқаронинг мурожаатлари қабул қилинди. Мурожаатларнинг 85 таси суд масалалари, 50 таси прокуратура, 57 таси ички ишлар иш юритувига ҳамда 91 таси бошқа масалаларга оид мурожаатни ташкил этган.
Ушбу мурожаатларнинг ижроси бош прокуратура томонидан назоратга олинган. Бу борадаги ишлар давом этмоқда.
Эслатиб ўтамиз, Ўзбекистон Президентнинг 2019 йил 7 ноябрдаги фармонига асосан Светлана Ортиқова Ўзбекистон Республикаси бош прокурорининг ўринбосари лавозимига тайинланган эди. Унга қадар Светлана Ортиқова Ўзбекистон Сенати раиси ўринбосари лавозимида ишлаб келган.
Изоҳ (0)