Европада хавфсизлик ва ҳамкорлик ташкилотининг ОАВ эркинлиги бўйича вакили Арлем Дезир Тошкент ҳокими Жаҳонгир Ортиқхўжаевнинг «Kun.uz» журналистларига таҳдиди ҳақидаги хабарлардан хавотирда эканлгини билдирди.
«Ўзбекистонда юқори мансабли шахснинг «Kun.uz» журналистларига таҳдидидан хавотирдаман. Бу вазият бўйича Бош прокуратуранинг тезкор муносабатини олқишлайман ва батафсил ўрганиш олиб борилишига ва журналистларнинг хавфсизлиги таъминланишига умид қиламан», — деб ёзган Арлем Дезир ўзининг Twitter’даги саҳифасида.
Буюк Британиянинг Ўзбекистондаги элчиси Тим Торлот ҳам мазкур вазиятга ўз муносабатини билдирди.
«Афсуски, ҳали Тошкент ҳокими билан учраша олмадим. Мен унинг яқинда қилган баёнотларидан хавотирдаман. Журналистларнинг хавфсизлиги — ОАВ эркинлигининг асосий принципи. Буюк Британия ҳар доим журналистлар ва эркин ОАВлар ҳимоясини қўллаб-қувватлайди. Умид қиламанки, учрашганимизда бу масалани муҳокама қила оламиз», — деб ёзган элчи Twitter’да.
Эслатиб ўтамиз, 16 ноябрь куни ижтимоий тармоқларда Тошкент шаҳар ҳокими Жаҳонгир Ортиқхўжаевнинг журналистларни йўқ қилиш, гейга чиқариш билан таҳдид қилгани ҳақидаги аудио ёзув тарқалган эди.
Ҳокимнинг журналистларга таҳдидини «Адолат», ЎзХДП, ЎзЛиДеП партиялари, шунингдек, Ўзбекистон Журналистлари ижодий уюшмаси қоралаб чиққан, Бош прокуратура ва Адлия вазирлиги ушбу ҳолат юзасидан ўрганиш олиб бораётганини маълум қилганди. Жаҳонгир Ортиқхўжаев ўзи ҳақорат ва таҳдид қилган журналистлар билан учрашгач, тушунмовчиликка барҳам берилган.
АОКА раҳбари Комил Алламжонов Жаҳонгир Ортиқхўжаевнинг ҳақорат ва таҳдидларига тўлақонли ҳуқуқий баҳо берилишига ишонч билдирди.
Изоҳ (0)