Тошкент вақти билан 17 ноябрь тонггида Мексиканинг Сан-Мигел-де-Аленде шаҳрида профессионал бокс кечаси бўлиб ўтади. Мазкур кечада ўзбекистонлик бокчси Ҳасанбой Дўсматов рингга кўтарилади, дея хабар қилмоқда Olamsport.
Рио—2016 Олимпиадаси чемпиони ўзининг проф боксдаги дебют жангида мексикалик 19 ёшли боксчи Хесус Сервантес Виллануэвага қарши жанг қилади.
Маълумот учун, Хесус ёш бўлишига қарамай, проф рингда 16 та жанг ўтказган. Тўққизта жангда ғалаба қозонган, шуларнинг бештаси нокаут билан якунланган. Ҳисобида еттита мағлубият бўлиб, уларнинг барчасида нокаутга учраган. Виллануэва сўнгги жангини шу йилнинг 4 октябрь куни Абраҳам Родригесга қарши ўтказиб, мағлуб бўлган.
16 ноябрь куни боксчилар анъанага кўра, тарозидан ўтиш маросимида иштирок этди. Ҳар икки боксчи ҳам белгиланган вазн меъёрини бажарди. Дўсматов 48 килограмм ва 200 грамм тош босди. Бокс оқшоми афсонавий Оскар де ла Ҳояга тегишли Golden Boy Promotions промоутерлик компанияси томонидан ўтказилмоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)