Туркия президенти Ражаб Тоййиб Эрдўғон ҳамда Россия президенти Владимир Путин телефон орқали суҳбат қилиб, Суриядаги низоларни ҳал этиш борасида ўзаро фикр алмашди. Бу ҳақда «РИА Новости» хабар берган.
«Суҳбат давомида Сурия шимоли-шарқидаги вазиятни барқарорлаштириш, ушбу йўналишда давлатнинг ҳудудий яхлитлиги ва сувернитетига дахл қилмаслик лозимлиги муҳокама этилди», — дейилган Кремль хабарида.
Президентлар Идлиб деэскалация зонасидаги вазиятни ҳам муҳокама қилган. Суҳбат давомида 2018 йилда келишив олинган икки томонлама ҳамкорлик доирасида иш юритиш лозимлиги таъкидланди.
Туркия ва Россия давлат раҳбарлари Сурия конституция қўмитасининг 30 октябрь – 1 ноябрь кунлари Женевада бўлиб ўтган йиғилиши якунларида қабул қилинган қарорларни маъқуллади. Улар Остона форматидаги музокаралар жараёнида кафил давлатларнинг Сурия ҳудудидаги вазиятни сиёсий диалог воситасида ҳал этиш энг тўғри йўл эканлигини қайд этди.Мавзуга доир: Эрдўғон «шов-шувли» мактубни Трампга қайтариб беради
Шунингдек, Эрдўғон ва Путин олий даражада ўтадиган навбатдаги алоқалар графигини келишиб олди.
«Тинчлик булоғи» операцияси ҳақида
9 октябрда Анқара Сурия шимоли-шарқида Туркиядаги қочоқлар учун хавфсиз зона ташкил этиш мақсадида «Сурия демократик кучлари» курд жангарилари ва ИШИД террорчиларига қарши «Тинчлик булоғи» ҳарбий операциясини бошлаган. Дунё давлатлари туркларнинг ушбу ҳаракатларини қоралаган.
17 октябрда Анқара ва Вашингтон Сурия шимоли-шарқидаги операцияни 120 соатга, курдлар хавфсиз зона ҳудудидан чиқиб кетиши учун тўхтатишни келишиб олди ва санкциялар бекор қилинди.
22 октябрда Сочида Россия президенти Владимир Путин ва Турия давлат раҳбари Ражаб Тоййиб Эрдўғон Сурия ҳудудидаги нотинч вазиятни муҳокама қилди ва «Тинчлик булоғи» операциясини 23 октябрдан яна 150 соатга тўхтатиш ва ўт очмаслик ҳақидаги шартлашув муддати якунига етгач ҳамкорликда Туркия—Сурия чегарасида 30 километрлик ҳудудни барпо этиш учун қўшма патрул тадбирлари ўтказиш ҳақида меморандум имзолади.
1 ноябрда курдларнинг Туркия чегарасидан 30 километр узоқликка чекингани ва улар тарк этган ҳудудни Сочида имзоланган меморандумга мувофиқ Сурия қўшинлари ва Россия ҳарбий полицияси эгаллаши маълум бўлди. 5 ноябрда Туркия ҳамда Россия ҳарбийлари Сурия шимолидаги Айн-ал-Араб аҳоли пунктидаги (Кобани) иккинчи қўшма патрул тадбирларини бошлади.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)