Тошкент вилояти Зангиота туманида яшовчи фуқаронинг уйига юзига ниқоб кийган шахслар ғайриқонуний равишда кириб, босқинчилик жиноятини содир этди. Бу ҳақда Ўзбекистон Ички ишлар вазирлиги ҳузуридаги Тергов департаменти хабар берди.
Маълум қилинишича, 2019 йил 5 ноябрь куни соат 03:30 да Акбар (исми ўзгартирилган) ва Шахбоз (исми ўзгартирилган) юзларига ниқоб кийиб, болта билан қуролланган ҳолда, фуқаро Раҳим (исми ўзгартирилган)нинг уйига ғайриқонуний равишда кирган. Босқинчилар Раҳимга тан жароҳати етказиб, қўл ва оёқларини электр учун сим ёрдамида боғлаган ва ертўлада сақланган 30 миллион сўм пулни босқинчилик йўли билан эгаллаб, ҳодиса жойидан яширинган.
Дастлабки тиббий хулосага кўра, Раҳимда бош мия ёпиқ жароҳати, бош мия чайқалиши, чап тирсак суяги ўрта учлигидан ёпиқ майданалиб синиб силжиши, ўнг елка соҳаси юқори учлиги кесилган жароҳатлари аниқланган.
Тергов-тезкор гуруҳи томонидан ҳодиса жойидан иш учун аҳамиятга молик ашёвий далиллар расмийлаштириб олинган.
Мазкур ҳолат юзасидан Тошкент вилояти ИИББ томонидан Акбар ва Шахбозга нисбатан Жиноят кодексининг 164-моддаси 3-қисми «в» банди билан жиноят иши қўзғатилган.
Олиб борилган тезкор қидирув тадбирлари жараёнида Акбар ва Шахбоз ушланиб, иш бўйича гумон қилинувчи тариқасида жалб қилиниб, сўроқ қилинган. Сўроқ давомида улар иқрорлик кўрсатмаларини берган ҳамда гумон қилинувчи Акбарнинг уйидан 13 миллион 140 минг сўм нақд пул, бир дона қора рангли ниқоб ва уч дона резина қўлқоп ашёвий далил тариқасида олинган.
Ҳозирда ушбу жиноят иши бўйича дастлабки тергов ҳаракатлари давом эттирилмоқда.
Изоҳ (0)