Андижон вилояти, Қорасу шаҳар газ таъминоти корхонаси «Ҳудудгаз Андижон» МЧЖда қоровул бўлиб ишлаган Мадаминжон Исроиловнинг ўлими ҳақида ижтимоий тармоқларда тарқатилган маълумотлар юзасидан «Ҳудудгазтаъминот» АЖ матбуот хизмати муносабат билдирди.
Унда марҳум Мадаминжон Исроилов шу йилнинг 21 октябрь куни, «Ҳудудгаз Андижон» МЧЖ бош директори Давронбек Салохитдиновга тегишли, Хонобод шаҳридаги ёзги уйнинг (дача) қурилиш ишларига мажбуран жалб қилинганида, устига бетон девор ағдарилиши оқибатида вафот этгани айтилган.
Ҳодиса сабабларини аниқлаш учун зудлик билан «Ҳудудгазтаъминот» АЖ масъул ходимларидан иборат ишчи гуруҳ тузилиб, Мадаминжон Исроиловнинг ўлими юзасидан хизмат текшируви ўтказилган.
Хизмат текшируви натижасида, марҳум «Ҳудудгаз Андижон» МЧЖ ходими эмаслиги, балки «Ўзтрансгаз» АЖ газ таъминоти ташкилотининг «Андижонгаз» ҳудудий газ таъминоти филиали болиғи Шавкатбек Қодиров ва Мадаминжон Исроилов ўртасида 2017 йил 14 сентябрдаги меҳнат шартномаси тузилганлиги аниқланган. Марҳумнинг меҳнат дафтарчасидаги охирги ёзув ҳам 2017 йил 14 сентябрь куни ёзилганлиги қайд этилган.
Бундан ташқари, ёзги уйнинг мулк ҳуқуқи бутунлай бошқа шахсларга тегишли эканлиги ҳам аниқланган. Хонобод шаҳар ҳокимлиги томонидан тақдим этилган ҳужжатларга кўра, мазкур объект фуқаро Д.Р.нинг (мулк эгасининг исми ва фамилияси ахлоқ меъёрларга кўра ошкор этилмаган) шахсий мулки ҳисобланиб, марҳумни ишдан бўш вақтида қурилиш ишларига ёллаган.
Шунингдек, Мадаминжон Исроиловнинг яқин қариндошлари ва дўстлари билан суҳбат давомида, «Ҳудудгаз Андижон» МЧЖга нисбатан уларнинг ҳеч қандай шикоятлари йўқлиги маълум қилинган.
Хабарда айтилишича, айни пайтда ушбу ҳолат юзасидан Андижон вилояти Бандлик ва меҳнат муносабатлари Бош бошқармаси томонидан, мазкур бахтсиз воқеани атрофлича текшириш учун махсус комиссия тузилган.
Изоҳ (0)