Тошкент вилояти ва Қашқадарёдаги нефть базада 14 млрд сўмдан ортиқ камомад ва ўзлаштиришлар аниқланди

Тошкент вилоятидаги «Пахта» нефть базасида нефть маҳсулотларини қабул қилиш, сақлаш, тарқатиш, кирим-чиқим ҳисобининг юритилиши юзасидан ўтказилган ўрганишда жами 2,7 миллиард сўмлик камомад аниқланди. Бу ҳақда Энергетика вазирлиги ахборот хизмати хабар берди.

Маълум бўлишича, нефть маҳсулотлари сиғимларидаги маҳсулотнинг ҳақиқий қолдиғи билан ҳисобхона қолдиғи таққосланганда жами 300 миллион сўмлик 32 тонна камомад ҳамда 476 минг сўмлик 83 килограмм ортиқча маҳсулот мавжудлиги аниқланган.

Шунингдек, ўрганиш даврида 2019 йил 25 мартидан — 10 октябрга қадар истеъмолчиларга етказиб берилган нефть маҳсулотларини автотарози орқали харидор ҳақидан уриб қолиш ҳисобига 1,6 миллиард сўмлик 222,5 тонна нефть маҳсулоти ўзлаштирилган.

Бундан ташқари, жамиятдаги 26-сиғимда сақланаётган 111 468 килограмм миқдордаги мойнинг сифати талабга мувофиқ эмаслиги аниқланган.

Аҳолига хизмат кўрсатиш ва савдо билан боғлиқ ҳолатларда ҳам камчиликлар қайд этилди. Текширув давомида нефть маҳсулотларининг истеъмолчиларга етказиб берилмаганлиги аниқланди. Базага киришдаги автомобиль тарозилари қасддан ўзгартириб қўйилган ҳамда автотцистерналар оғирлиги 140 килограммгача камайтириб кўрсатилган.

Натижада сўнгги ярим йил ичида қарийб 222,5 тонна турли хилдаги нефть маҳсулотлари истеъмолчиларга етказиб берилмай ўзлаштирилган.

Айни пайтда мазкур нефть базасининг фаолиятини текшириш ҳуқуқни муҳофаза қилувчи органлар иштирокида давом этмоқда.

Вазирлик матбуот хизматининг хабар беришича, жорий йилнинг октябрь ойида «Ўзнефтгазинспекция» мутахассислари томонидан «Қарши нефть базаси» МЧЖ ва унга қарашли филиалларнинг нефть маҳсулотлари сиғимларидаги маҳсулотнинг ҳақиқий қолдиғи билан ҳисобхона қолдиғи таққосланганда ҳамда сифат таҳлили учун намуналар олинганда жами 11,5 миллиард сўмлик камомад ва ортиқча маҳсулот аниқланган.

Жумладан, 220,3 миллион сўмлик 38,4 тонна камомад, 50,9 миллиом сўмлик 5,7 тонна ортиқчалик ҳамда 160,1 миллион сўмлик 26,4 тонна асоссиз ҳисобдан чиқариш, 514,6 миллион сўмлик 97703 литр маҳсулот сифати бузилганлиги қайд этилган.

Шунингдек, 7,5 миллиард сўмлик 3850 тонна нефть маҳсулотларни «Ўзбекнефтгаз» АЖ рухсатисиз АЁҚШларга имтиёзли нархларда тарқатилган.

Бундан ташқари, жамиятга қарашли сиғимларда сақланаётган нефть маҳсулотларнинг сифати ўрганилганда, жами 514,6 миллион сўмлик 97703 литр нефть маҳсулотининг сифати бузилганлиги маълум бўлди.

Назорат ва таҳлил натижалари бўйича расмийлаштирилган ҳужжатлар ҳуқуқни муҳофаза қилиш органларига тақдим этилди.