Қарши шаҳри марказидаги 14-мактаб девори шаҳар ҳокими топшириғига кўра бузиб ташланди. Орадан 3 ойдан кўп вақт ўтса-да, девор қайта қурилмаяпти. Бу эса нафақат ўқувчилар, ўқитувчилар учун ҳам ноқулайлик туғдирмоқда. Бу ҳақда «Дарё»га мурожаат қилган мактаб ўқитувчилари маълум қилди.
— Жорий йил 24 июнь куни шаҳарнинг ўша пайтдаги ҳокими Жамшид Фозилов мактабимизда ҳудуд аҳолиси иштирокида сайёр қабул ўтказди, — дейди мактаб ўқитувчиси Шаҳло Жўраева. — Ўшанда аҳоли мактаб девори абгор аҳволга келгани, эрта-индин бирор бир ўқувчининг устига қулаб тушишидан қўрқаётганини билдирди. Шунда ҳоким мутасаддиларга хавфли ҳолатга келиб қолган деворни бузиб, ўрнига янги девор қуриш тўғрисида топшириқ берди. Сайёр қабул тугагач, кўчага чиқсак, девор бузилаётган экан. Хурсанд бўлдик. Демак, муаммомиз ҳал бўларкан деб. Аммо чучварани хом санаган эканмиз. Девор бузилди, аммо қайта қурилмаяпти. Шу аҳволда ташлаб кетилди.
Мактаб ўқитувчиларининг айтишича, деворни ҳоким топшириғига кўра шаҳар ободонлаштириш бошқармаси ходимлари бузган.
— Деворни бузаётганлардан «қайта тиклаш ҳам сизларнинг зиммангиздами?» деб сўрадик, — дейди яна бир ўқитувчи Наргиза Қурбонова. — Улар ўша пайт айтишганди, «бизга фақат бузиш буюрилган» деб. Буни эшитиб, юрагимиз шув этганди. Қўрққанимиз бошимизга тушди.
28 йилдан бери ушбу мактабда фаолият юритувчи Олия Эшованинг таъкидлашича девор бузиб ташлангач, мактаб ҳовлисига хоҳлаган одамлар кириб чиқяпти.
— Мактаб ҳовлиси ланг очиқ, хоҳлаган киши кириб чиқяпти, энг ёмони, ўқувчиларимиз ҳам шу нураган девор оша мактабга ўтяпти, — дейди Олия Эшова. — Биз эса мурожаат қилишдан чарчадик. Ўтган қарийб 4 ой муддат давомида шаҳар ҳокимлиги, халқ таълими бошқармасига ҳам чиқдик. Аммо ҳеч ким тингламаяпти. Ҳатто хатимизга жавоб ҳам беришмайди.
Мактаб раҳбариятининг маълум қилишича, девор бузиб ташлангач 5 июль куни директор номидан шаҳар ҳокимига хат чиқарилади. Буни қарангки, хатда девор табиий талофат туфайли нураб тушгани айтилиб, уни тиклашда амалий кўмак сўралади. Девор учун ёрдам сўраб шаҳар ҳокимлиги ва халқ таълими бўлими мудирига 9 июль, 10, 16, 17 сентябрь ҳамда 16 октябрь кунлари ҳам хат чиқарилади. Аммо натижа йўқ.
Қизиқ, мактаб раҳбарияти ва ўқитувчилар «Дарё» мухбири билан суҳбат чоғида девор ҳоким топшириғига кўра, шаҳар ободонлаштириш бошқармаси томонидан бузилганини айтмоқда. Хатда эса девор табиий талофат туфайли нурагани ёзилган.
Қарши шаҳар ободонлаштириш бошқармаси бошлиғи Зафар Нажимовнинг айтишича, мактаб деворини ҳоким топшириғига асосан ободонлаштириш бошқармаси ходимлари бузган. Аммо бошқарма ходимарига янги девор қуриш топшириғи берилмаган.
— Шаҳар ободонлаштиришга деворни бузиб, қайта қуриш топшириғи ҳам берилган, — дейди Шаҳло Жўраева. — Чунки, ўзим ҳоким қабулига бориб, девор қурилмаганини айтганимда, Жамшид Фозилов ободонлаштириш бошқармаси бошлиғини чақириб, «нега ҳалигача мактаб девори қурилмаган?» деб сўраганди. Ўшанда муаммони тез орада ҳал қилиш топшириғини берилганди.
Ушбу ҳудудда яшовчи ота-оналардан бири Мунаввар Бобомуродованинг айтишича, мактаб раҳбарияти деворни кимдир қуриб беришини кутмасдан ўзи ташаббус қилиб чиқиши, ота-оналардан ёрдам сўраб, муаммони ечиши лозим.
Мактаб ўқитувчилари нураган девор устидан ўтаётган ўқувчилардан хавотирда.
— Ўқувчиларимиздан бири шу жойдан ўтаман деб йиқилиб тушса ёки уларга бирор кор-ҳол бўлса, яна мактабдагилар айбдор бўладими? — дейди ўқитувчилар. – Ёки раҳбарлар кўнгилсизлик бўлишини кутяптими?
Изоҳ (0)