Qarshi shahri markazidagi 14-maktab devori shahar hokimi topshirig‘iga ko‘ra buzib tashlandi. Oradan 3 oydan ko‘p vaqt o‘tsa-da, devor qayta qurilmayapti. Bu esa nafaqat o‘quvchilar, o‘qituvchilar uchun ham noqulaylik tug‘dirmoqda. Bu haqda “Daryo”ga murojaat qilgan maktab o‘qituvchilari ma’lum qildi.
— Joriy yil 24-iyun kuni shaharning o‘sha paytdagi hokimi Jamshid Fozilov maktabimizda hudud aholisi ishtirokida sayyor qabul o‘tkazdi, — deydi maktab o‘qituvchisi Shahlo Jo‘rayeva. — O‘shanda aholi maktab devori abgor ahvolga kelgani, erta-indin biror bir o‘quvchining ustiga qulab tushishidan qo‘rqayotganini bildirdi. Shunda hokim mutasaddilarga xavfli holatga kelib qolgan devorni buzib, o‘rniga yangi devor qurish to‘g‘risida topshiriq berdi. Sayyor qabul tugagach, ko‘chaga chiqsak, devor buzilayotgan ekan. Xursand bo‘ldik. Demak, muammomiz hal bo‘larkan deb. Ammo chuchvarani xom sanagan ekanmiz. Devor buzildi, ammo qayta qurilmayapti. Shu ahvolda tashlab ketildi.
Maktab o‘qituvchilarining aytishicha, devorni hokim topshirig‘iga ko‘ra shahar obodonlashtirish boshqarmasi xodimlari buzgan.
— Devorni buzayotganlardan “qayta tiklash ham sizlarning zimmangizdami?” deb so‘radik, — deydi yana bir o‘qituvchi Nargiza Qurbonova. — Ular o‘sha payt aytishgandi, “bizga faqat buzish buyurilgan” deb. Buni eshitib, yuragimiz shuv etgandi. Qo‘rqqanimiz boshimizga tushdi.
28 yildan beri ushbu maktabda faoliyat yurituvchi Oliya Eshovaning ta’kidlashicha devor buzib tashlangach, maktab hovlisiga xohlagan odamlar kirib chiqyapti.
— Maktab hovlisi lang ochiq, xohlagan kishi kirib chiqyapti, eng yomoni, o‘quvchilarimiz ham shu nuragan devor osha maktabga o‘tyapti, — deydi Oliya Eshova. — Biz esa murojaat qilishdan charchadik. O‘tgan qariyb 4 oy muddat davomida shahar hokimligi, xalq ta’limi boshqarmasiga ham chiqdik. Ammo hech kim tinglamayapti. Hatto xatimizga javob ham berishmaydi.
Maktab rahbariyatining ma’lum qilishicha, devor buzib tashlangach 5-iyul kuni direktor nomidan shahar hokimiga xat chiqariladi. Buni qarangki, xatda devor tabiiy talofat tufayli nurab tushgani aytilib, uni tiklashda amaliy ko‘mak so‘raladi. Devor uchun yordam so‘rab shahar hokimligi va xalq ta’limi bo‘limi mudiriga 9 iyul, 10, 16, 17-sentabr hamda 16-oktabr kunlari ham xat chiqariladi. Ammo natija yo‘q.
Qiziq, maktab rahbariyati va o‘qituvchilar “Daryo” muxbiri bilan suhbat chog‘ida devor hokim topshirig‘iga ko‘ra, shahar obodonlashtirish boshqarmasi tomonidan buzilganini aytmoqda. Xatda esa devor tabiiy talofat tufayli nuragani yozilgan.
Qarshi shahar obodonlashtirish boshqarmasi boshlig‘i Zafar Najimovning aytishicha, maktab devorini hokim topshirig‘iga asosan obodonlashtirish boshqarmasi xodimlari buzgan. Ammo boshqarma xodimariga yangi devor qurish topshirig‘i berilmagan.
— Shahar obodonlashtirishga devorni buzib, qayta qurish topshirig‘i ham berilgan, — deydi Shahlo Jo‘rayeva. — Chunki, o‘zim hokim qabuliga borib, devor qurilmaganini aytganimda, Jamshid Fozilov obodonlashtirish boshqarmasi boshlig‘ini chaqirib, “nega haligacha maktab devori qurilmagan?” deb so‘ragandi. O‘shanda muammoni tez orada hal qilish topshirig‘ini berilgandi.
Ushbu hududda yashovchi ota-onalardan biri Munavvar Bobomurodovaning aytishicha, maktab rahbariyati devorni kimdir qurib berishini kutmasdan o‘zi tashabbus qilib chiqishi, ota-onalardan yordam so‘rab, muammoni yechishi lozim.
Maktab o‘qituvchilari nuragan devor ustidan o‘tayotgan o‘quvchilardan xavotirda.
— O‘quvchilarimizdan biri shu joydan o‘taman deb yiqilib tushsa yoki ularga biror kor-hol bo‘lsa, yana maktabdagilar aybdor bo‘ladimi? — deydi o‘qituvchilar. – Yoki rahbarlar ko‘ngilsizlik bo‘lishini kutyaptimi?
Izoh (0)