Тошкент шаҳар Чилонзор туманида жойлашган «Уголок» кафесида мижозлар ва кафе қўриқчилари ўртасида юз берган жанжалдан кейин мижозлардан бири вафот этди. Тошкент шаҳар ИИББ мазкур ҳолат бўйича расмий маълумот берди.
Хабар берилишича, 2019 йил 28 октябрь куни тахминан соат 21:00 да фуқаролар 24 ёшли Бобур З. ва 30 ёшли Мурод А. Тошкент шаҳар Чилонзор туманида жойлашган «Уголок» кафесида кечги таом билан спиртли ичимлик истеъмол қилган.
Шу вақт мобайнида Бобур З. мастлик билан боғлиқ хатти-ҳаракатлари оқибатида 21 ёшли Аҳмаджон А. ва 22 ёшли Далержон М. исмли кафе қўриқчиларининг эътироз билдиришига сабабчи бўлган ва ўртада низо келиб чиққан.
Шундан сўнг, улар «келишиб олиш» учун, яъни тортишувни давом эттириш мақсадида кафедан ташқарига чиқиб, муштлашган. Муштлашув оқибатида Бобур З. енгил тан жароҳати олиб, таниши Мурод А. билан таксига чиққан. Бироқ бироздан сўнг Мурод А.нинг мазаси бўлмаётганлиги учун улар автомобилдан тушган.
Чилонзор тумани тез ёрдам ходимлари Мурод А.ни тасодифан кўриб қолган ва касалхонага олиб кетаётган вақтда у вафот этган.
Мурод А.нинг ўлими бўйича олинган дастлабки суд тиббий ташхисига кўра, ўткир юрак қон томир етишмовчилиги ва спиртли ичимликдан заҳарланиш ҳолатлари аниқланган ва ҳеч қандай тан жароҳати аломатлари йўқлиги тўғрисида маълумот берилган.
Ҳозирда ушбу ҳолат Чилонзор тумани прокуратураси томонидан назоратга олинган.
ИИББ томонидан таъкидланишича, ҳолат юзасидан Чилонзор тумани ИИБ томонидан Аҳмаджон А. ва Далержон М.га нисбатан Ўзбекистон Республикаси Жиноят Кодексининг 277-моддаси (безорилик) 2-қисми «б» банди бўйича жиноий иш қўзғатилган ва тергов ҳаракатлари давом этмоқда.
Тошкент шаҳар ИИББ безорилик жинояти ва Мурод А.нинг ўлими ўртасидаги боғлиқликка тергов жараёнида аниқлик киритилиши ва натижаси бўйича батафсил ахборот берилишини маълум қилди.
Эслатиб ўтамиз, 2018 йил августида Юнусободда жойлашган Aurum 898 тунги клубида рўй берган пичоқбозлик оқибатида эркин курашчи, халқаро тоифадаги спорт устаси Жамшид Кенжаев вафот этганди.
Изоҳ (0)