Соғлиқни сақлаш вазирлиги сайтида 29 октябрь, сешанба куни «‘Навоийазот’га қарашли ПВХ заводида юз берган фавқулодда ҳолатдан жабрланганларга тиббий ёрдам кўрсатилмоқда» сарлавҳали хабар эълон қилинган эди. 30 октябрь куни «Ўзкимёсаноат» матбуот хизмати бу хабарга раддия бериб, 28 октябрь куни ПВХ заводи ва умуман «Навоийазот»да ҳеч қандай фавқулодда ҳолат юз бермаганини маълум қилди.
Мавзуга доир: «Навоийазот»га тегишли ПВХ заводида 4 киши номаълум газдан заҳарланиб касалхонага ётқизилди
Аввало таъкидлашимиз лозимки, инсон ҳаёти ва саломатлиги билан боғлиқ ҳар қандай ҳолат биз тиббиёт ходимлари учун фавқулодда вазият ҳисобланади.Сўнгги маълумотларга кўра, 28 октябрь куни соат 18:30 да «Навоийазот» АЖ хизмат машинасида таржимон кузатувида тўрт фуқаро кўнгил айниш, қайт қилиш, нафас қисиши, бош айланиши шикоятлари билан Республика шошилинч тиббий ёрдам илмий маркази Навоий вилоят филиали қабул бўлимига олиб келинган.
Кузатувчи таржимоннинг сўзларига кўра, соат 16:00 да «Навоийазот» ҳудудидаги «ПВХ, каустик сода ва метанол ишлаб чиқариш мажмуаси» қурилишида тўсатдан ҳавода ўткир газ ҳиди пайдо бўлган. Натижада уч нафар ишчи иш жойида нафаси сиқилиб йиқилган. Жабрланувчилар кузатувчилар ёрдамида воқеа жойидан зудлик билан «Навоийазот» АЖ Тиббий санитария қисмига олиб борилган. Бирламчи шифокор кўригидан сўнг Республика шошилинч тиббий ёрдам илмий маркази Навоий вилоят филиалига юборилган.
«Филиалимиз қабул бўлимида токсиколог врач кўригидан сўнг, беморларда юқори нафас йўллари шиллиқ қаватларида гиперемия, шиш аниқланган. Беморнинг шикояти, анамнези, объектив кўриги асосида ‘Номаълум газдан (раздражаюший) ингаляцион заҳарланиш, енгил даражаси’ дастлабки ташхиси қўйилган. Беморлар текшириш ва даволаш мақсадида Токсикология бўлимига ётқизилган. Бўлимда токсиколог кўригидан сўнг бошқа турдаги заҳарланиш клиник белгилари бўлмагани сабабли, шунингдек, озиқ-овқатдан заҳарланиш ташхиси ҳам инкор этилган», — дейди РШТЁИМ вилоят филиали директори О.Иномов.
Маълум бўладики, беморларнинг шикояти, анамнези, клиник белгиларидан келиб чиққан ҳолда айтиш мумкинки, озиқ-овқатдан заҳарланиш аломатлари бўлмаган. Номаълум газдан заҳарланиш ташхисининг асоси эса беморларнинг шикояти, ҳодиса содир бўлган вазият ва кўрик вақтида аниқланган клиник ўзгаришлар ҳисобланади.
Касб масъулиятидан келиб чиққан ҳолда ҳар бир шифокор учун у ким бўлишидан қатъи назар инсон ҳаёти устувор ҳисобланади. Шундан келиб чиққан ҳолда Соғлиқни сақлаш вазирлиги бундан буён ҳам одамлар саломатлигига таҳдид солувчи ҳар қандай вазиятни фавқулодда ҳолат ҳисоблаб, зудлик билан тезкор ва сифатли тиббий хизмат кўрсатишда давом этади.
Соғлиқни сақлаш вазирлиги Жамоатчилик билан алоқалар бўлими ахборотидан
Изоҳ (0)