Ўзгидромет Ўзбекистонда ноябрь ойининг бошида об-ҳаво қандай бўлишини маълум қилди.
Ўзгидрометнинг жаҳон об-ҳаво марказлари маълумотларига таяниб бераётган дастлабки баҳосига кўра, бу йилги ноябрь ойи ҳам ҳарорат, ҳам ёғинлар режимига кўра меъёрга яқин бўлади.
Ой давомида ҳарорат кечаси 8—13 даража илиқдан 0—5 даража илиққача (айрим жойларда 0—3 даража совуқ бўлиши мумкин), кундузи 20—25 даража илиқдан 8—13 даража илиққача ўзгариб туради.
Ноябрнинг биринчи кунлари Ўзбекистон ҳудудида нисбатан илиқ ҳаво сақланиб туради. Булутлар кўпайиб, 1 ноябрь куни республиканинг айрим жойларига ёмғир ёғиши мумкин. 2 ноябрда ёғингарчиликсиз об-ҳаво бўлади.
3 ноябрдан Ўзбекистон ҳудудига Россия ҳудудидан совуқ ва нам ҳаво оқими киришни бошлайди. Республикада ёмғир ёғиб, шамолнинг тезлиги кучаяди. 3 ноябрда шимолий вилоятларда, 4 ноябрда бутун ҳудуд бўйича ҳарорат 7—10 даражага пасаяди.
Изоҳ (0)