Фарғона вилояти соғлиқни сақлаш бошқармасининг 25 октябрь куни берган хабарига кўра, Фарғона шаҳар 9-сонли мактабгача таълим ташкилотида тарбияланаётган 11 нафар тарбияланувчи овқатдан заҳарланди.
Бош прокуратура матбуот котиби Ҳаёт Шамсутдиновнинг хабар беришича, улар 23—24 октябрь кунлари «ўткир диарея» ташҳиси билан вилоят юқумли касалликлар шифохонасига мурожаат қилган. Шифохонага ётқизилган тарбияланувчиларда кузатилаётган хасталик аралаш овқатланиш натижасида келиб чиқадиган функсионал бузилиш ташхиси қўйилган.
Қайд этилишича, ушбу боғча тарбияланувчиларига 2019 йил январь ойидан буён «Аутсорсинг» тизими бўйича «Фар Г.Т.» хусусий корхонаси томонидан маҳсулотлар тайёрланиб келинган.
Ҳолат юзасидан Фарғона шаҳар прокуратураси томонидан терговга қадар текшириш ҳаракатлари олиб борилмоқда. Текширишда оммавий заҳарланиш ҳолати ҳақидаги хабар ўз вақтида берилмаганлиги бўйича мутасадди идораларга хизмат текширувлари тайинланган.
Эслатиб ўтамиз, бундан аввал Бекободда боғча болалари овқатдан заҳарланганди. Боғча мудираси, ошпаз ва ҳамшира лавозим мажбуриятларини бажармаганлиги ва лоқайд хатти-ҳаракати натижаси оқибатида болалар соғлиғига зарар етказилганлиги сабабли, ишдан олинган.
Мавзуга доир:
Изоҳ (0)