Ўзбекистон Миллий гвардияси Facebook ижтимоий тармоғида фарғоналик блогер Баҳодирхон Элибоев томонидан «Миллий гвардия — ходимлар пулига кўз олайтирманг!» сарлавҳаси остида чоп этилган мақолага муносабат билдирди.
Блогернинг ёзишича, Ўзбекистон Республикаси Миллий гвардияси масъул офицерлари Фарғона вилоятига ташриф буюриб, Қўриқлаш бошқармаси ходимларини аттестациядан ўтказган. Аттестация давомида қўриқлаш хизмати ходимларидан маълум миқдорда пул йиғилиб, полковник Фармонқулов янги Tracker автомашинасида кузатиб қўйилган. Бу ва бошқа маълумотлар тўғрисида блогерга Қўриқлаш хизмати ходими томонидан маълум қилинган.
Миллий гвардия томонидан маълум қилинишича, ушбу мақола чоп этилган кундан бошлаб Миллий гвардия қўмондонлиги томонидан ишчи гуруҳ тузилиб, мазкур ҳолат юзасидан хизмат суриштируви белгиланган.
Мутасадди ходимлар томонидан олиб борилаётган суриштирув ишлари мобайнида аниқланишича, блогер Баҳодирхон Элибоевга маст ҳолатида маълумот берган фуқаро Қўриқлаш хизмати ходими А.Г. бўлиб, баён қилинган айрим ҳолатлар у аттестациядан муваффақиятли ўта олмаганлиги учун жаҳл устида гапирилганлиги тан олинган.
Шунингдек, ходим А.Г. полковник Фармонқуловнинг Tracker автомашинасида кузатиб қўйилганлиги ва шу каби айтилган гапларни асослаб бера олмаслигини билдириб, ёлғон ахборот берганлиги учун Қўриқлаш хизмати ходимларидан ва Миллий гвардия қўмондонлигидан узр сўраган.
Қайд этилишича, бугунги кунда суриштирув ишлари қатъий назорат остида давом этмоқда ва якуний натижалари бўйича Миллий гвардия матбуот хизмати томонидан қўшимча маълумот берилади.
Изоҳ (0)