«Менинг юртим» телеканали орқали эфирга узатиладиган «Марказий студия» мухбирлари Сурхондарё вилояти Бойсун туманида 18 ёшли ўқувчи нима сабабдан ўз жонига қасд қилгани тўғрисида лавҳа тайёрлади.

Жорий йилнинг 24 сентябрь куни Акобир Хазратқулов исмли йигит келишмовчилик сабаб ўзини осиб қўйган, бироқ орадан бир ой ўтган бўлса-да, ҳуқуқ-тартибот органлари ҳамон бу борада ҳеч қандай маълумот берганича йўқ.

«Бирга кетаётганимизда йўлимиздан битта тош чиқди. Акобир олиб, уни отиб юборди. Тош олдинроқда кетаётган қизнинг олдига бориб тушди. Бундан жаҳли чиққан қиз қўполлашиб кетди. Бориб дадасига ‘булар мени тош билан уряпти’ деб айтиб берди. Дадасининг асаби бузилиб, ўртоғим билан жанжаллашиб кетди ва эртага коллежингга бориб, директорини олдига олиб кириш билан таҳдид қилди», — дейди марҳумнинг дўсти.

Қизнинг дадаси бориб келганидан сўнг, 24 сентябрь куни Бойсун туманидаги Қишлоқ хўжалиги касб-ҳунар коллежи директори Доно Авазов марҳум Акобирни чақириб, ҳақоратлайди. «Оилангда фаросат бўлмаганидан кейин, акангда ҳам бўлмайди-да», — дея коллеж директори Акобирнинг акасини ҳам ҳақорат қилган.

Директор Акобирга икки-уч марта шапалоқ тушириб, шунақа кийиниб келиб мени ишдан ҳайдатмоқчимисанлар деган.

Акобирнинг дўстларини айтишича, тош қизга тегмаган, бироқ қиз оёғининг болдир қисмидаги кўкарган жойни кўрсатиб «шу ерга теккан» деб туриб олган. Марҳумнинг акаси вазиятга ечим топиш мақсадида маҳалла посбонига мурожаат қилган. У эса қизнинг дадаси Акобирни жаримага тортишни талаб қилаётганини, агар бир кун пахтага чиқса масаласини ҳал қилиб беришни ваъда қилган. Акобирнинг акаси пахтага бориб келган, бироқ бу орада йигит ўз жонига қасд қилган.