Туркманистонга Ўзбекистондан пахта чигити олиб кирилаётгани хабар қилинди

Туркманистондаги Ахал вилоятидаги ёғ заводи Ўзбекистондан келтирилган пахта чигити сабаб яна қайта иш бошлади, дея хабар берган «Хроника Туркменистана».

Туркманистон Транспорт-логистик маркази темирйўл хабарномалари ходимининг айтишича, заводга кунига 5 тадан 10 тагача вагонда чигит олиб келинмоқда. Пахта чигити охирги йилларда октябрдан февралга қадар тез-тез сотиб олинади. Шунингдек, Ўзбекистондан автотранспорт воситасида ҳам чигит олиб ўтилмоқда. Энди завод бир суткада 300 тонна маҳсулот етказиб бериши мумкин, дейилган нашр хабарида.

Туркманистон Ўзбекистонга чигит эвазига бензин юбормоқда. Мамлакатда газдан ишлаб чиқариладиган бензиннинг юборилиши 2019 йилдан бошланган. «Хроника Туркменистана» нашрининг тахминича икки давлат ушбу маҳсулотларни ўзаро бартер қилмоқда.

Эксперт-технологлар «Ахал» ёғининг сифати юқорилиги айнан Ўзбекистонда етиштирилган пахта чигитларига боғлиқ эканлигини таъкидлаган.

Завод иш бошлаганига қарамай «Ахал» пахта ёғи ҳали ҳам аҳоли учун сотувга чиқарилмаган. Бошқа номдаги ёғ маҳсулотлари ҳам давлат дўконларида танқис бўлиб қолган. Вилоятлар ва пойтахт Ашхободда ҳафтасига икки марта «Туркманобод» ёғлари сотилмоқда.

Пойтахт аҳолисининг сўзларига кўра Ашхободнинг ўзида Ёқимли (Ýakymly), Ҳазрат (Hezret), Арчабил (Arçabil) каби давлат дўконларида ҳафтасига икки марта юк машинасида ёғ олиб келинаётгани, сотувчилар улардан 2 блокдан 10 литрли ёғ идишларини тушириб олаётгани, якунда навбатда турган 40-50 одамдан 20 нафарига маҳсулот тақсим қилиб сотилмоқда.

Сотувчилар «ўлганнинг устига тепган қилиб» ёғ ёнига «Сумбар» ярим литрли тозаланган сувини қўшиб бераётгани, ёғ ва сув учун жамиси 5 манат нарх белгилаб олган. Аслида ёғ 3,40 манат, сув эса 1 манат туради. Харидор ушбу савдога розилик бермаса, унинг навбати кейинги одамга бериб юборилади.Аввал Туркманистон—Ўзбекистон чегарасидан махфий юклар ортилган фуралар қатнови амалга оширилаётгани ва уларнинг Туркманистон президенти Гурбангули Бердимуҳамедовнинг опаси Гулнабат Довлетованинг имзоси ва мамлакат Қизил ярим ой миллий жамиятининг «Текшириш тақиқланади» муҳри билан икки давлат ўртасида қатновни амалга ошираётгани хабар қилинган.

Ўзбекистон Давлат божхона қўмитаси ушбу хабарга муносабат билдирган ва мазкур ҳолат юзасидан ўрганиш ишлари амалга оширилгани, ушбу хабарлар ҳеч қандай асосга эга эмаслигини маълум қилган.