«Сурия демократик кучлари» гуруҳининг вакили курд жангариларининг Туркия чегарасидан 32 км узоқликка чекинганини маълум қилди

«Сурия демократик кучлари» (СДК) курд жангари отрядларининг расмий вакили Мустафо Боли жангчиларнинг Сурия ва Туркия чегарасидаги ҳудуддан 32 километр нарига чекинганини билдирди. Бу ҳақда «Известия» хабар берди.

У СДК курдларининг Телл-Ободдан Рас ал-Айнгача бўлган ҳудудни тарк этганлигини маълум қилган.

9 октябрда Туркия Сурия шимоли-шарқида «Тинчлик булоғи» ҳарбий операциясини бошлаган. Ушбу ҳарбий ҳаракатлардан Анқаранинг кўзлаган мақсади мамлакатдаги қочоқларни Сурияга қайтариш учун «хавфсиз ҳудуд» ташкил қилиш, ушбу зонани тузиш учун эса чегара яқинидаги курд жангариларини сиқиб чиқаришдан иборат эди.

Ушбу ҳарбий операция сабаб Туркия дунё давлатларининг кескин танқидларига учради, жумладан, Европа Иттифоқи, АҚШ, Ироқ, Миср, Эрон, Франция, Германия, Буюк Британия, Бельгия, Эстония, Канада каби давлатлар Анқаранинг ушбу сиёсатини қоралади. АҚШ президенти Дональд Трамп Туркия вазирликлари ва вазирларига нисбатан санкциялар қўллади.17 октябрда Вашингтон ҳамда Анқара Суриядаги урушни тўхтатиш юзасидан музокаралар олиб борди ва курдлар чегара ҳудудидан узоқлашиши учун «Тинчлик булоғи» операцияси 120 соатга тўхтатилди.22 октябрда Россия президенти Владимир Путин ва Туркия давлат раҳбари Ражаб Тоййиб Эрдўғон Суриядаги вазиятни муҳокама қилди ва икки давлат ўртасида ҳудудда қўшма патруль тадбирларини ўтказиш, Адана шартномасига амал қилиш, Дамашқ чегара қўшинларининг операцияларда иштирок этиши, шунингдек, 23 октябрдан курдлар ҳудуддан чиқиб кетиши учун «Тинчлик булоғи»ни яна 150 соатга тўхтатиш бўйича меморандум имзолади.23 октябрда АҚШ расмийлари курд жангариларининг Сурия шимоли-шарқидаги «хавфсиз зона» ҳудудидан чиқиб кетганлигини тасдиқлади. Дональд Трамп эса Туркияга қўлланилган санкцияларни бекор қилди.