Хоразмда 22 октябрь, сешанба куни бир оиланинг 4 нафар аъзоси ис газидан заҳарланиб вафот этгани юзасидан ФВВ батафсил текширув ўтказди.
Қайд этилишича, воқеа 22 октябрдан 23 октябрга ўтар кечаси юз берган. Хоразм вилояти Янгиариқ тумани, Остона қишлоғида истиқомат қилувчи фуқаролар К.Ғ., унинг турмуш ўртоғи ва 2 нафар фарзандлари иситиш қозонининг дудбурони носозлиги боис ис газидан заҳарланиб, вафот этган.
Бахтсиз ҳодиса сабаблари ўрганилганда, хонадондаги иситиш қозони дудбуронининг (мўриси) ичига ёз пайтида қушлар ин қургани, дудбурон хас-хашак ва қушларнинг пати билан тўлиб қолгани ва тортиш кучини йўқотганлиги сабаб бўлган.
Табиий газнинг чала ёниши оқибатида ис гази ҳосил бўлиши ҳамда унинг уй ичига тўпланиши фуқароларнинг ўлимига олиб келган.
«Кириб келган куз—қиш мавсумида иситиш печларидан фойдаланишдан аввал дудбуронларнинг тозалиги ва тўғри ўрнатилганлигига ишонч ҳосил қилинг», — дейилади ФВВ хабарида.
Эслатиб ўтамиз, ўтган йилнинг октябрь ойида Фарғона вилоятининг Риштон туманида шундай ҳодиса содир бўлганди. Унда печнинг дудбуронига қушлар уя қургани 2 кишининг ўлимига сабаб бўлганди.
Изоҳ (0)